सल्यान, बैशाख-१६, सल्यान जिल्लामा बाल बिबाहको आरोपमा बेहुला सहित तीनजना पक्राउ परेका छन् । जिल्लाको बनगाड कुपिण्डे नगरपालिकाका १४ वर्षीय बेहुलाले ११ बर्षकी बालिकालाइ भगाएका हुन् । उमेर नपुगेका कीशोरले कलिली बालिकालाई विवाह गरेको आरोपमा बेहुलासहित तीन जनालाई प्रहरीले नियन्त्रणमा लिएको हो ।
बैशाख १३ गते राति खाना खाएर सुतिसकेको अवस्थामा किशोरले आफ्नी छोरी भगाएर लगेको थाहा पाएपछि बालिकाका बुवा किशोरको घरमा पुगेर छोरीलाई फिर्ता ल्याइ प्रहरीकहाँ उजुरी दिन पुगेका हुन्। सोही जाहेरीका आधारमा आरोपितलाई पक्राउ गरेको प्रहरीले जनाएको छ।
दुबै बालबालिका स्थानीय विद्यालयमा कक्षा ६ मा अध्ययनरत रहेको बुझिएको छ। यस घटनामा बाल विवाहसँगै बलात्कार समेत भएको भन्दै जाहेरी आएकाले सोही अनुसार मुद्दा प्रकृया अघि बढाइने प्रहरी प्रवक्ता अर्जुन पौडेलले जानकारी दिएका छन्।
