बागलुङमा छाडा कुकुरहरु नियन्त्रण गर्न बन्ध्याकरण गर्न थालिएको छ । सडकमा कुकुरको संख्या बढ्दै गएपछि दुर्घटनाको जोखिम समेत बढेकाले बन्ध्याकरण गरी न्यूनीकरण गर्न बुधबार र बिहीबार शिविर नै सञ्चालन गरिएको हो ।
भेटेनरी अस्पताल तथा पशु सेवा विज्ञ केन्द्र, केन्द्रीय रिफरल अस्पताल काठमाण्डौँ एवं बागलुङ नगरपालिकाको संयुक्त पहलमा सडकमा छाडा छोडिएका कुकुर तथा घरपालुवा कुकुरलाई समेत बन्ध्याकरण गरिएको छ ।
बन्ध्याकरण शिविरमा रेबिज विरुद्धको खोप समेत लगाइएको भेटेनरी अस्पताल तथा पशु सेवा विज्ञ केन्द्र बागलुङले जनाएको छ ।
१० जनाको विज्ञ टोलीले शिविरमा सहजिकरण गरेको शिविरमा बुधबार मात्रै ७९ वटा छाडा तथा घरपालुवा कुकुरहरुको बन्ध्याकरण गरिएको छ ।
पशु चिकित्सक खितबहादुर श्रेष्ठका अनुसार , ‘एउटा कुकुरले वर्षमा दुई पटक मात्रै ब्यायो भने पनि एउटाले ६ वटा पाउछ, यस्ता कयौँ कुकुर सडकमा छन्, त्यसैले कुकुरको न्यूनीकरण भएपछि रेबिज रोग पनि घट्ने भएकाले यो अभियान सुरु भएको हो ।’ पशु चिकित्सक डा.अर्जुन अर्यालले बन्ध्याकरण गर्दा कुकुरलाई केही समय पीडा हुने भएपनि लामो समय दुःखाई नहुने गरी औषधि दिने गरेको बताए ।
उनका अनुसार दिनमा ६० भन्दा बढी कुकुरको बन्ध्याकरण गरेको गरिएको छ । कुकुरको बन्ध्याकरणको लागि यो समयमा चिसो हुने भएकोले घाउ पाक्ने समस्या नहुने हुदा छिट्टै निको हुने बताएका छन् ।
बागलुंग बजार भन्दा बाहिर बाट समेत घरपालुवा कुकुरहरुलाई बन्ध्याकरण र रेबिजको खोप लगाउन आएका कुकुर धनिहरुले यो कार्यको प्रसंसा गरेका छन् यसबाट कुकुरको संख्या नियन्त्रण हुने र टोकी हाले पनि रेबिज लाग्ने खतरा नरहने भएकोले शिविर महत्वपूर्ण भएको बताए ।
