२१२ औं भानु जयन्तीको  अवसरमा वेष्ट प्वाइन्टमा छन्दमा कबिता र अन्तर सम्बाद कार्यक्रम

देवी सुवेदी जि.सी.- बेनी, असार २९ – नेपालका आदिकवि भानुभक्त आचार्यको २१२ औं जन्मजयन्तीको अवसरमा म्याग्दीको वेष्ट प्वाइन्ट आवासीय माध्यमिक विद्यालयमा एक भव्य साहित्यिक कार्यक्रम आयोजना गरिएको छ। असार २९ गते भानु जयन्तीको अवसरमा नयाँ पुस्तामा भाषा, साहित्य र संस्कृतिप्रति चेतना र रुचि अभिवृद्धि गर्ने उद्देश्यसहित कार्यक्रम सञ्चालन गरिएको हो।

कार्यक्रमका प्रमुख वक्ता कवि तथा समालोचक रामप्रसाद सुवेदीले ‘नेपाली भाषा साहित्यमा आदिकवि भानुभक्त आचार्यको योगदान’ विषयमा विशेष प्रस्तुति दिनुभयो। उहाँले भानुभक्तले नेपाली भाषालाई साहित्यिक उचाइमा पुर्‍याउन गरेको प्रयास र त्यसलाई आम जनसम्म पुर्‍याउने कार्यमा युवाकवि मोतिराम भट्टको योगदानबारे समेत स्पष्ट चर्चा गर्नुभयो।

अन्तरसम्वाद कार्यक्रमपछिको विशेष सत्रमा सुवेदीले ससंगीत छन्दोबद्ध कवितावाचन गर्दै मातृभूमिप्रेम, प्रणय र समसामयिक सन्दर्भमा आधारित छन्दहरूको आकर्षक प्रस्तुति दिनुभयो। उहाँको प्रस्तुति प्रभावशाली मात्र नभएर भावनात्मक पनि रहेको सहभागीहरूले बताएका छन्।

कार्यक्रममा विभिन्न तहका विद्यार्थीहरूले उत्साहपूर्वक भाग लिएका थिए। कक्षा २ का छात्र आहान मल्लले आदिकविको संक्षिप्त जीवनी वाचन गर्दा श्रोताहरू मन्त्रमुग्ध बनेका थिए। त्यसैगरी कक्षा १२ की छात्रा विजय भण्डारीले मार्मिक कविता वाचन गर्दा हल शान्त र आनन्दित बनेको  थियो।

त्यस्तै, शिक्षिका निरुता बुढाथोकी र म्यानेजिङ कोअर्डिनेटर शैलेश श्रेष्ठले छुट्टाछुट्टै कविता वाचन गरेर साहित्यिक उत्सवमा थप ऊर्जा भरे। शिक्षक अभिभावक संघका सल्लाहकार तथा साहित्यकार गणनाथ पौडेलले गहिरो सामाजिक सन्देश बोकेको रचना प्रस्तुत गर्नुभयो। भाइस प्रिन्सिपल कृष्ण बहादुर जिसीले कविशिरोमणि लेखनाथ पौड्यालको “चरीको विलाप” लगायतका क्लासिक कविताहरू ससंगीत वाचन गरेर पुरानो र नयाँ साहित्यबीचको सन्दर्भ जोड्नुभयो।

कार्यक्रममा वेष्ट प्वाइन्ट एजुकेशन फाउन्डेसन म्याग्दी प्रालीका अध्यक्ष कृष्ण प्रसाद श्रेष्ठ, संस्थापक निर्देशकद्वय सुदर्शन कुमार श्रेष्ठ र सुवास कुमार श्रेष्ठ, विद्यालयका शिक्षक, कक्षा १२ का सम्पूर्ण विद्यार्थी तथा अभिभावकहरूको उल्लेखनीय उपस्थिति थियो।

कार्यक्रमको अध्यक्षता वेष्ट प्वाइन्ट एजुकेशन फाउन्डेसन म्याग्दी प्रालीका अध्यक्ष कृष्ण प्रसाद श्रेष्ठले गर्नुभएको थियो। त्यसैगरी प्राविधिक संयोजन भाइस प्रिन्सिपल सरोज लकान्द्रीले र कार्यक्रम सञ्चालन नेपाली भाषा शिक्षक केशवराज पौडेलले गर्नुभएको थियो।

साहित्यिक प्रस्तुतिका माध्यमबाट आदिकविको योगदानलाई सम्मान गर्दै नयाँ पुस्तामा साहित्यिक चेतना फैलाउने उद्देश्यले आयोजना गरिएको यो कार्यक्रम सफल, भावनात्मक र प्रेरणादायी बन्न पुगेको सहभागीहरूको धारणा छ।