स्कुटर चालक मिजार घाईते घटनाको छानविन गर्न समिति गठन

बेनी, साउन-२७,  बेनी नगरपालिका–८ डल्लेपिपल बसपार्कमा रात्रीकालीन संयुक्त चेकजाँचका क्रममा स्कुटर चालक घाइते भएको घटनामा छानबिन समिति गठन गरिएको छ। जिल्ला प्रहरी कार्यालय म्याग्दीका प्रहरी निरीक्षक सागर पौडेलको संयोजकत्वमा बनेको उपसमिति सत्यतथ्य पत्ता लगाउने जिम्मेवारी पाएको छ।

घटना साउन २४ गते राति करिब ८ः४० बजे गलेश्वरबाट बेनीतर्फ आउँदै गरेको ग १७ प ८२५७ नम्बरको स्कुटर रोक्ने क्रममा भएको हो। बेनी नगरपालिका–४, सिंगा तातोपानीका २५ वर्षीय चालक दिनेश मिजारको आँखामा प्रहरीको हातमा रहेको चेकिङ बोर्ड ठोक्किँदा चोट लागेको प्रहरीद्वारा जारी प्रेस नोटमा उल्लेख छ।

घाइते मिजारलाई तत्काल बेनी अस्पतालमा प्रारम्भिक उपचारपछि पोखरास्थित हिमालय आँखा अस्पताल, त्यसपछि थप उपचारका लागि काठमाडौंको टिचिङ अस्पताल लगिएको थियो। शल्यक्रिया पश्चात मिजार मंगलबार डिस्चार्ज भएका छन् र एक सातापछि फलोअपका लागि बोलाइएको छ।

प्रहरीको दाबी अनुसार मिजार मापसे गरेर गलत दिशाबाट आउँदै गर्दा रोक्ने क्रममा दुर्घटना भएको हो। तर, पीडितका पिता दिलबहादुर सार्कीले घटनाको निष्पक्ष छानबिन र दोषीमाथि कारबाहीको माग गरेका छन्। वडा अध्यक्ष अणबहादुर खड्काले पनि निस्पक्ष छानबिन र उपचारमा कुनै कमी हुन नदिन आग्रह गरेका छन्।

प्रहरी नायब उपरीक्षक सूर्य थापाले उपसमितिले प्रतिवेदन पेश गरेपछि दोषी देखिएकामाथि कारबाही गरिने स्पष्ट पार्नुभएको छ।