दिवंगत आफन्तजनहरूको सम्झनामा बेनीमा सापारू

बेनी, साउन-२५,  म्याग्दीको सदरमुकाम बेनीमा शनिबार दिवंगत आत्माको शान्ति कामनाका लागि सपारु, अर्थात् तयामचा नाग–नागिनी नाच भव्य रूपमा प्रदर्शन गरिएको छ। नेपाल भाषा मंका खलको आयोजनामा जनैपूर्णिमादेखि दुई दिनसम्म बेनीबजार परिक्रमा गरी वर्षभरी दिवंगत भएका व्यक्तिहरूको सम्झना गरिएको हो।

एकमहिने बर्खेनाच अन्तर्गत महत्वपूर्ण मानिने गाईजात्रा पर्वको अवसरमा, नेवार समुदायका अगुवाहरूको उपस्थितिमा जनैपूर्णिमा तथा क्वाटी पुन्हीको दिन तयामचा—सापारु र भोलिपल्टसम्म नाग–नागिनी नाच देखाउने परम्परा रहेको छ। यस नाचको इतिहास करिब तीन सय वर्ष पुरानो मानिन्छ। हारमोनियम, ¥याली, मृदङ्गजस्ता परम्परागत वाद्यसंगीतको धुनसँगै राजमति गीत समेत प्रस्तुत गरिएको थियो।

नेपाल भाषा मंका खलका अध्यक्ष कृष्णप्रसाद श्रेष्ठका अनुसार, यस वर्ष १७ जना नेवार समुदायका दिवंगत आत्माको सम्झनामा सपारु सञ्चालन गरिएको हो। आइतबार दिउँसो लक्ष्मीनारायण मन्दिरबाट बजार परिक्रमा गरी कार्यक्रम सम्पन्न हुनेछ।

धार्मिक विश्वास अनुसार, सोही दिन यमलोकको ढोका खुल्ने भएकाले मृतकको नाममा पूजा गरेर मठ–मन्दिर, चैत्य, गुम्बा परिक्रमा गर्दा शिवलोक प्राप्त हुने मान्यता छ। गाईजात्रामा मृतकका परिवारबाट एक पुरुषलाई नागाको भेषमा र एक महिलालाई नागिनीको भेषमा सजाएर पठाइन्छ, जसलाई विशेष श्रृंगार गरिन्छ।

नेवार समुदाय मात्र नभई गैरनेवार समुदायका मृतकहरूको घर अगाडि समेत सपारु पुग्ने चलनले बेनीबजारको सामाजिक एकता र सहकार्यलाई झल्काउने गरेको छ। यस वर्षको सपारु नाग–नागिनी नाच कम खर्चिलो तर उत्साहपूर्ण रूपमा सम्पन्न भएको आयोजकले जनाएको छ।