बेनी, म्याग्दी, साउन -२१, म्याग्दीको बेनी नगरपालिका–५ गाजेनस्थित ऐतिहासिक जगन्नाथधाममा बुधवार श्रावण शुक्ल द्वादशीको अवसरमा भगवान् जगन्नाथको भव्य रथयात्रा तथा सरकारी भोज कार्यक्रम सम्पन्न भएको छ।
जगन्नाथ मन्दिर गुठी सञ्चालन तथा व्यवस्थापन समितिको आयोजनामा भएको कार्यक्रममा मन्दिर परिसरभित्र भजनकीर्तन गर्दै भक्तजनले काँधमा मूर्ति बोकेर परिक्रमा गरेका थिए। भगवानको प्रत्यक्ष दर्शन सबैलाई एकै दिन गराउने उद्देश्यसहित यो कार्यक्रम विगतदेखि हरेक वर्ष निरन्तर हुँदै आएको गुठीका अध्यक्ष निलकण्ठ शर्माले जानकारी दिनुभयो।
रथयात्रा तथा सरकारी भोज कार्यक्रमको उद्घाटन बेनी नगरपालिकाका नगरप्रमुख सुरत केसीले गर्नुभयो। उहाँले धार्मिक पर्यटन प्रवर्द्धन गर्न बेनी नगरपालिकाको तर्फबाट आवश्यक पहल भइरहेको बताउनुभयो।
त्यसैगरी प्रमुख प्रशासकीय अधिकृत अर्जुन शर्माले धार्मिक क्षेत्रहरुको प्रचारप्रसारका लागि बुकलेट प्रकाशन गरिएको जानकारी दिनुभयो भने वडा नं. ५ का अध्यक्ष गोविन्द बानियाँले सडक स्तरोन्नतिमा जोड दिइएको बताउनुभयो।
कार्यक्रममा नेकपा एमाले म्याग्दीका प्रतिनिधि रामप्रसाद सुवेदी, नेपाल पत्रकार महासंघ गण्डकी प्रदेशका उपाध्यक्ष प्रकाश पौडेल, पण्डित भीमनाथ पराजुली लगायतले मन्तव्य राख्दै धार्मिक र ऐतिहासिक सम्पदाहरुको संरक्षण र प्रवर्द्धनमा एकजुट हुनुपर्नेमा जोड दिनुभयो।
रथयात्राको दिन झण्डै १ हजार भक्तजनको सहभागिता रहेको आयोजकले जनाएको छ। कार्यक्रममा ४१ पाथी चामलको खिर पकाएर सबैलाई खुवाइएको थियो भने जगन्नाथ आमा समूह र युवा क्लबले स्वयंसेवा गरेका थिए।
कार्यक्रम जगन्नाथ मन्दिरका अध्यक्ष निलकण्ठ शर्माको अध्यक्षता, सचिव रामचन्द्र पौडेलको सञ्चालन र कोषाध्यक्ष प्रविन पौडेलको स्वागतमा सम्पन्न भएको हो। साथै आर्थिक सहयोगदाताहरुलाई दोसल्ला र कदरपत्रद्वारा सम्मान गरिएको थियो।
