बेनी, म्याग्दी, साउन-१०, म्याग्दी बहुमुखी क्याम्पसमा आयोजित पहिलो स्ववियु ‘ए’ साइड फुटबल प्रतियोगिताको उपाधि आयोजक टिम सेतोले जितेको छ। फाइनल खेलमा आयोजककै ग्रिन टिमलाई १–० ले पराजित गर्दै सेतो टिम विजयी बनेको हो।
स्ववियु सचिव मन्जुर कटुवाल क्षत्रीका अनुसार प्रतियोगिताको अन्तिम खेलमा आयोजक टिमहरूबीच प्रतिस्पर्धा भएको थियो। विद्यार्थीहरूलाई शैक्षिक गतिविधिसँगै खेलकुद तथा अन्य रचनात्मक कार्यक्रममा सक्रिय बनाउने उद्देश्यले प्रतियोगिता आयोजना गरिएको हो।
प्रतियोगितामा अनुशासित टिमको रूपमा रिजोइस टिमलाई सम्मान गरियो। उत्कृष्ट खेलाडी सिजन भण्डारी, सर्वाधिक गोलकर्ता अनुपम श्रेष्ठ, उत्कृष्ट डिफेन्डर तारामोहन श्रीपाली र ईमर्जिङ खेलाडी बिम्बा क्षेत्रीलाई नगद पुरस्कार तथा प्रमाणपत्र प्रदान गरिएको थियो।
स्ववियुले पहिलोपटक आयोजना गरेको प्रतियोगितामा विभिन्न कक्षाका १० टिमले सहभागिता जनाएका थिए। प्रतियोगिताको सह–आयोजक म्याग्दी बहुमुखी क्याम्पस नै रहेको थियो।
विजेता टिमलाई १५ हजार, उपविजेतालाई ७ हजार रुपैयाँसहित ट्रफी, मेडल र प्रमाणपत्रले सम्मान गरिएको थियो।
समापन कार्यक्रममा क्याम्पस सञ्चालक समितिका अध्यक्ष दिपेन्द्र श्रेष्ठ, क्याम्पस प्रमुख श्रीधर सुबेदी, जिल्ला खेलकुद विकास समितिका सदस्य नगेन्द्र मल्ल, वडा नम्बर ७ का वडा सदस्य सोहन श्रेष्ठ, जिल्ला फुटबल संघका अध्यक्ष कुमार बानियाँलगायतको उपस्थिति रहेको थियो।
प्रतियोगिताको रेफ्री संयोजन पुरण छन्त्याल र एन्जन बानियाँले गर्नुभएको थियो।
स्ववियु सभापति संगम चोखाल क्षेत्रीका अनुसार नेतृत्वमा आएपछि स्ववियुले रक्तदान, इन्डक्सन कार्यक्रम, ग्रामीण क्षेत्रका विद्यार्थीलाई शैक्षिक सामग्री वितरणजस्ता विभिन्न रचनात्मक गतिविधिहरू गर्दै आएको छ।
