म्याग्दी, साउन-४, साफ यू–१७ महिला फुटबल च्याम्पियनसिपमा अब म्याग्दीकी छोरीहरू पनि राष्ट्रिय मैदानमा देखिने भएका छन्। नेपाली राष्ट्रिय यू–१७ महिला फुटबल टिम छनौटका लागि आयोजित प्रदेशस्तरीय प्रतिस्पर्धाबाट गण्डकी प्रदेशतर्फबाट म्याग्दीका दुई खेलाडी रिदिमा भट्टचन र सञ्चिता गुरूङ छनौट हुन सफल भएका छन्।
अखिल नेपाल फुटबल संघ (एन्फा)ले आयोजना गरेको छनोट कार्यक्रमपछि भट्टचन र गुरूङको नाम केन्द्रिय टिमका लागि सिफारिस गरिएको जिल्ला खेलकुद विकास समितिका अध्यक्ष सुमन श्रेष्ठले जानकारी दिनुभयो।
बेनी नगरपालिका वडा नं ७ न्यूरोड निवासी भट्टचन गोलरक्षकका रूपमा प्रस्तुत हुनुहुन्छ भने बेनपा–४ थामडाँडाकी गुरूङ मिडफिल्डरको भूमिकामा छनौट हुनुभएको हो। दुबै खेलाडी बेनीको प्रतिष्ठित शिक्षण संस्था ‘न्यू वेष्ट पोइन्ट आवासीय माध्यमिक विद्यालय’मा अध्ययनरत छात्रा हुन् ।
रिदिमा भट्टचन, बेनी नगरपालिका–७ न्यूरोडकी बासिन्दा, गोलरक्षकको भूमिकामा उत्कृष्ट ठहरिनुभयो भने सञ्चिता गुरूङ, बेनपा–४ थामडाँडाकी खेलाडी, मिडफिल्डरको रूपमा छनौट हुनुभएको हो। दुबै खेलाडी न्यू वेष्ट पोइन्ट स्कुलको खेलकुद विकासमा भएको योगदानको साक्षी समेत हुन्।
जिल्ला फुटबल संघका अध्यक्ष कुमार बानियाँका अनुसार विद्यालयस्तरीय छात्रा फुटबलमा उत्कृष्ट प्रदर्शन देखाइसकेकी यी खेलाडीहरूको केन्द्रिय छनौटमा परेको खबरले म्याग्दीको छात्रा फुटबललाई थप उर्जा दिएको छ।
साफ यू–१७ महिला फुटबलका लागि म्याग्दीबाट जम्मा ८ जनाको सहभागिता रहेको थियो। पछिल्लो समय जिल्लामा फुटसल र छात्रा फुटबल नियमित सञ्चालनमा आएपछि महिला फुटबल खेलाडीको तयारी सहज र सशक्त बन्दै गएको जिल्ला खेलकुद विकास समितिले जनाएको छ।
आगामी अगस्टमा भुटानको थिम्पुमा आयोजना हुने यू–१७ महिला फुटबल च्याम्पियनसिपका लागि राष्ट्रिय स्तरमा अन्तिम छनौट प्रक्रिया हुँदैछ। जिल्ला खेलकुद विकास समितिले छनौटमा परेका खेलाडीहरूलाई शुभकामना व्यक्त गरेको छ।
