पर्वत, असार -३२, पर्वत जिल्लामा यस वर्ष असार सकिँदासम्म जम्मा ६० प्रतिशत मात्र धान रोपाइँ सम्पन्न भएको कृषि ज्ञान केन्द्र पर्वतले जनाएको छ। समयमै मनसुन सुरु भए पनि पर्याप्त मात्रामा वर्षा नहुँदा र जनशक्तिको अभावले गर्दा कृषकहरूले समयमा रोपाइँ गर्न नसकेको केन्द्रले जनाएको छ।
सिंचाइको सुविधा भएका तथा खोलानालाको नजिकका अधिकांश क्षेत्रहरूमा असारको दोस्रो सातासम्मै रोपाइँ सकिएको थियो। तर, मकै खेती गर्ने र ढिलो बाली लगाउने क्षेत्रहरूमा अझै रोपाइँ चलिरहेको कृषि ज्ञान केन्द्र पर्वतकी सूचना अधिकारी सोविता सुवेदीले जानकारी दिनुभयो।
जिल्लाको जलजला, मोदी र महाशिला गाउँपालिकामा कृषकहरूले अधिकांश रोपाइँ सकेका छन् भने पैयूँ, फलेवास, विहादी र कुश्मा नगरपालिकाका धेरैजसो क्षेत्रमा रोपाइँ अझै बाँकी छ।
धान खेती हुनेमध्ये ३६ प्रतिशत क्षेत्रफलमा मात्रै सिंचाइको सुविधा रहेकामा त्यो पनि सधैँ उपलब्ध नहुने अवस्था रहेको बागवानी विकास अधिकृत सुवेदीले बताउनुभयो।
गत वर्ष पर्वतमा ७ हजार १ सय ८० हेक्टर क्षेत्रफलमा धान खेती गरिएको थियो। यो वर्ष पनि सोही बराबरमा रोपाइँ हुने अनुमान गरिएको छ।
पर्वतमा विउ समयमा नपरेको, मकै ढिला थन्किएको, एक बाली मात्र लगाइने खेत तथा बाझो भूमिहरूमा पनि रोपाइँमा ढिलाइ भएको केन्द्रले जनाएको छ।
गत वर्ष पर्वत जिल्लामा करिब २६ हजार ३३ मेट्रिक टन धान उत्पादन भएको थियो। फलेवास नगरपालिका, पैयूँ गाउँपालिका, जलजला गाउँपालिका र कुश्मा नगरपालिकालाई प्रमुख धान उत्पादक क्षेत्र मानिन्छ।
यस क्षेत्रमा सावित्री, रामधान, मानिसरा, मनसुली, कालो मसिनो, महाराजा, होलसी, हर्दिनाथ, झिनुवा, पोखरेली जेठो बूढो, माछापुच्छ्रे, जर्नेली, सुगन्ध, हाइब्रिड लगायतका जातका धान रोप्ने गरिन्छ। लोकतन्त्र अनलाइनको सहयोगमा
