देवी जिसी/ बेनी, असार-२६, म्याग्दीको बेनीमा प्रदेश आयुर्वेदिक चिकित्सालयको स्थानीय तह डाटा भेरिफिकेसन तथा गुणस्तर सुधार सम्बन्धी तथ्यांक विश्लेषण र वार्षिक समिक्षा कार्यक्रम सम्पन्न भएको छ।
कार्यक्रममा प्रदेश आयुर्वेदिक चिकित्सालय बेनीका प्रमुख कमलराज अधिकारीले आर्थिक वर्ष २०८०/०८१ मा कार्यालयले सम्पन्न गरेका गतिविधिहरू र बजेट खर्चको विवरण प्रस्तुत गर्नुभएको थियो। उहाँका अनुसार गत वर्षको १ करोड ६ लाख रूपैयाँको बजेटमध्ये चालुतर्फ ७६ प्रतिशत र पुँजीगत तर्फ ७ प्रतिशत खर्च भएको हो।
आयुर्वेदिक कार्यालयले जिल्लाका सबै स्थानीय तहहरूमा नागरिक आयुर्वेदिक कार्यालय स्थापना गरेको र प्रत्येक गाउँपालिकामा भान्सा सुधार कार्यक्रम तथा स्तनपायी आमाहरूलाई लक्षित पौष्टिक औषधि वितरण कार्यक्रम सञ्चालन गरेको जानकारी दिइएको छ। यसैबीच, गैह्र बजेटीय सहयोगमा २०८२ सालको वैशाखदेखि हंजिरी प्रविधिमा आधारित ई-मार प्रविधिको सुरुवात गरिएको समेत उल्लेख गरिएको छ।
प्रमुख अधिकारी कमलराज अधिकारीले तथ्यांक प्रस्तुत गर्दै सवारी साधनको अभाव, भौतिक पूर्वाधारको कमजोरी लगायतका चुनौतीहरू अझै पनि विद्यमान रहेको बताउनुभयो।
कार्यक्रमका प्रमुख अतिथि जिल्ला समन्वय समितिका कार्यबाहक प्रमुख दिलकुमारी खत्रीले ग्रामीण क्षेत्रका बजारहरूमा झोलामा आयुर्वेदिक औषधि लिएर बिक्री वितरण हुने प्रवृत्तिलाई नियमन गर्न आवश्यक रहेको बताउँदै, उपभोक्ता तथा खरिदकर्तालाई सचेत बनाउनुपर्नेमा जोड दिनुभयो।
कार्यक्रममा नगर प्रमुख सुरत केसी, प्रादेशिक जनस्वास्थ्य कार्यालय म्याग्दीका प्रमुख भुवन ठकुरी, शिक्षा समन्वय इकाई म्याग्दीका प्रमुख विदुर चापागाईं, प्रदेश अस्पताल बेनीका मेडिकल अधिकृत डा. रामु सापकोटा, सहायक प्रमुख जिल्ला अधिकारी अनिशा आचार्य लगायतले मन्तब्य ब्यक्त गर्नुभएको थियो।
कार्यक्रमको दोस्रो सत्रमा कार्यालयका विविध कार्यक्रम तथा तथ्यांकको विस्तृत प्रस्तुतीकरण गरिएको थियो भने, लामो समय सेवा गरी अनिवार्य अवकाश प्राप्त गर्नुभएका अन्नपूर्ण गाउँपालिकाका रणबहादुर खत्रीलाई बिदाइ समेत गरिएको थियो।
कार्यक्रम प्रदेश आयुर्वेदिक चिकित्सालय बेनीका प्रमुख कमलराज अधिकारीको अध्यक्षता, प्रमुख अतिथि जिल्ला समन्वय समितिकी कार्यबाहक प्रमुख दिलकुमारी खत्री रहनुभएको थियो। कार्यक्रममा बरिष्ठ वैद्य रामप्रसाद रेग्मीले स्वागत मन्तव्य र सञ्चालन कविराज दामोदर शर्माले गर्नुभएको थियो।
