म्याग्दी, असार-१०, धवलागिरी गाउँपालिकाले आगामी आर्थिक वर्ष २०८२/०८३ का लागि ४६ करोड ५६ लाख ६ हजार ५६३ रुपैयाँको बजेट पारित गरेको छ। गाउँपालिकाको केन्द्र मुना बजारमा सोमबार सम्पन्न २४ औं गाउँसभा बैठकमा उपाध्यक्ष रेशम पुनमगरले बजेट प्रस्तुत गर्नुभएको थियो। छलफलपछि बजेट सर्वसम्मत रूपमा पारित गरिएको हो।
चालु आर्थिक वर्षमा खर्च हुन नसकेको २ करोड र ४५ लाख आन्तरिक आम्दानीसहित संघीय तथा प्रदेश सरकारबाट प्राप्त हुने अनुदानलाई स्रोत मानेर आगामी वर्षको बजेट तयार पारिएको हो।
यसअघि, चालु आर्थिक वर्षमा ४७ करोड ६४ लाख रुपैयाँ विनियोजन गरिएकोमा ४२ करोड ८० लाख मात्रै आम्दानी भएको तथ्याङ्क सार्वजनिक गरिएको छ। चालु तर्फ ६२ प्रतिशत मात्र खर्च भएको हो भने, पूँजीगत तर्फ १४ करोड ५७ लाखको बजेटमध्ये ७ करोड ५१ लाख रुपैयाँ खर्च भएको गाउँसभामा जानकारी दिइएको छ।
गुर्जामा सडक पु¥याउने लक्ष्यसहित लुलाङ–गुर्जा सडक निर्माणका लागि १ करोड ७५ लाख विनियोजन गरिएको छ। अहिले पनि करिब ५ किलोमिटर बाटो खोल्न बाँकी रहेको बताइएको छ।
धवलागिरीकै एक मात्र सडक नपुगेको वडा मानिएको गुर्जामा पछिल्लो ३ वर्षदेखि बाटो खोल्ने काम प्राथमिकतामा राखिएको छ।
गाउँपालिकाको केन्द्र मुना नजिकै घट्टेखोलामा निर्माणाधीन प्रशासकीय भवनलाई पूर्णता दिन १ करोड बजेट छुट्याइएको छ भने ढल व्यवस्थापनका लागि मुनामा ६९ लाख विनियोजन गरिएको छ।
वडा नं. ५ को मल्कवाङदेखि भेडिखाल्टा जोड्ने सडक, मुना–दर–मुडीसम्मको सडकमा बेलिब्रिज जडान, खाम्ला–खिवाङ सडकको मार्ग विस्तार, ताकम–मुना वैकल्पिक सडक स्तरोन्नति लगायतका योजनामा पनि छुट्टाछुट्टै रकम विनियोजन गरिएको छ।
हेम माविको दशकोठे भवन निर्माण, जनजागृति मावि भवन, र हेम माविले सञ्चालन गरेको आवासीय छात्रावासमा समेत बजेट छुट्याइएको छ।
बेरोजगार युवालाई लक्षित गर्दै १५ लाख रुपैयाँ सहुलियत ऋणका लागि छुट्याइएको छ। सिप परीक्षण र प्रमाणिकरणको व्यवस्था पनि गरिने छ।
पालिका स्तरीय कवर्ड हल निर्माण, स्थानीय पाठ्यक्रममा आधारित पुस्तक प्रकाशन, र जलजलामा पर्यटन महोत्सव आयोजनाका लागि पनि बजेट छुट्याइएको छ।
पर्यटन प्रवर्धन अन्तर्गत, करिब ३ हजार मिटर उचाईमा रहेको जलजलामा ३० लाख रुपैयाँको बजेट विनियोजन गरिएको छ। त्यहाँ खानेपानी र शौचालयको लागि पनि १५ लाख छुट्याइएको छ।
अध्यक्ष प्रेमप्रसाद पुनले प्रस्तुत गर्नुभएको नीति तथा कार्यक्रम, त्रिवर्षीय खर्च संरचना, खर्च अनुमोदन, बिनियोजन विधेयक लगायतका प्रस्तावहरू सभाले सर्वसम्मत रुपमा पारित गरेको छ।
