बेनी, असार-६, रघुगंगा गाउँपालिकाले आगामी आर्थिक वर्ष २०८२/०८३ का लागि पचास करोड रुपैयाँभन्दा बढी बजेट ल्याएको छ। ‘समृद्ध रघुगंगा, सुखी रघुगंगावासी’ भन्ने नाराका साथ प्रस्तुत यो बजेट पचास करोड एघार लाख चालीस हजार आठ सय बीस रुपैयाँ रहेको छ।
बिहीबार गाउँपालिकाको केन्द्र मौवाफाँटमा सम्पन्न उन्नाइसौं गाउँसभामा यो बजेट पारित भएको हो। गाउँपालिकाका अध्यक्ष भवबहादुर भण्डारीले वार्षिक नीति तथा कार्यक्रम प्रस्तुत गरेपछि उपाध्यक्ष प्रेमकुमारी पुनले बजेट पेश गर्नुभएको थियो।
बजेट विवरणमा हेर्दा – चालुतर्फ सैंतीस करोड सरसट्ठी लाख साठी हजार आठ सय बीस रुपैयाँ र पूँजीगततर्फ बाह्र करोड त्रिचालीस लाख अस्सी हजार रुपैयाँ छुट्याइएको छ। आन्तरिक राजश्वतर्फ एक करोड पाँच लाख र चालु वर्षको बाँकी रकम दुई करोड पचपन्न लाख गरी कुल तीन करोड साठी लाख रुपैयाँ आन्तरिक आयतर्फ रहेको छ।
मुख्य कार्यक्रमहरूमा – महिलाका लागि उद्योग दर्ता निःशुल्क, कृषि सामग्री खरिदमा पचहत्तर प्रतिशतसम्म अनुदान, र स्वरोजगारमूलक गतिविधिलाई प्राथमिकता दिइने भएको छ। ‘कृषिलाई उद्यम, कृषकलाई उद्यमी’ अभियानलाई निरन्तरता दिइनेछ।
पशुपंक्षी विकासका लागि – औषधी खरिदमा पन्ध्र लाख पचास हजार, भेडा-बाख्राको उत्पादकत्व बृद्धिमा पाँच लाख, र बंगुरपालनमा तीन लाख रुपैयाँ छुट्याइएको छ।
विशेष कार्यक्रममा – कुकुर व्यवस्थापन र रेबिज नियन्त्रणका लागि सात लाख रुपैयाँ र प्रधानमन्त्री रोजगार कार्यक्रममा तेत्तीस लाख बहत्तर हजार रुपैयाँ बजेट विनियोजन गरिएको छ।
गाउँपालिकाले महिला, दलित, अपाङ्गता भएका व्यक्ति र विपन्न समुदायलाई उद्यमशिलता तालिम दिने भएको छ।
