मालिका , असार-५, म्याग्दीको मालिका गाउँपालिका-६ दरबाङ्गमा जलवायु मैत्री कृषि व्यवसाय तथा बजार व्यवस्थापन विषयक दुई दिने तालिम सफलतापूर्वक सम्पन्न भएको छ। असार २ र ३ गते सञ्चालन भएको उक्त तालिममा मालिका र धौलागिरी गाउँपालिकाका २१ जना अगुवा कृषकले सहभागिता जनाएका थिए।
गुड नेवर्स इन्टरनेशनल नेपालको आर्थिक तथा प्राविधिक सहयोग र संगम म्याग्दीको आयोजनामा भएको यस तालिममा १८ जना महिला र ३ जना पुरुष कृषकको सहभागिता रहेको थियो।
तालिमका क्रममा कृषकहरूले विषादीका प्रकार र तिनका नकारात्मक प्रभावहरूका साथै प्राकृतिक खेती प्रवर्धनमा विभिन्न सरोकारवालाहरूको भूमिकाबारे जानकारी प्राप्त गरेका छन्। कृषि उद्यमशीलता, कृषि क्षेत्रका जोखिम र त्यसको व्यवस्थापनका विषयमा सहभागितामूलक खेल र उदाहरणका माध्यमबाट सिकाइ प्रदान गरिएको थियो।
खासगरी, तरकारी बालीको टिपाइको समयदेखि उत्पादनपछि गरिने पोस्ट हार्भेस्ट क्रियाकलाप जस्तै प्रि कुलिङ, सफाइ, ग्रेडिङ, सर्टिङ, भण्डारण र ढुवानीका विषयमा व्यापक जानकारी दिइएको थियो। साथै बजारीकरणका ५ पी अर्थात् People, Production, Place, Price र Promotion का बारेमा पनि सिकाइ प्रदान गरिएको थियो।
तालिमका सहभागी अकबहादुर जुग्जालीले भन्नुभएको छ – “कुन बेला कुन तरकारी उत्पादन गर्दा बढी मूल्य पाइने भन्ने कुरा स्पष्ट भएको छ। अब आउने समयमा त्यस अनुसार बाली उत्पादन गरेर नाफा कमाउन सफल हुनेछौं।”
त्यसैगरी अर्की सहभागी भूलमाया गर्बुजाले यस तालिमलाई साना व्यावसायिक कृषकहरूका लागि अत्यन्तै उपयोगी तालिम भएको बताउनुभएको छ।
कार्यक्रममा गुड न्यूज इन्टरनेशनलकी कार्यक्रम अधिकृत विष्णुकुमारी बरालले बालबालिकाको सरसफाइ, पोषण र शिक्षामा अभिभावकले गर्नुपर्ने भूमिकाको बारेमा आफ्ना विचार व्यक्त गर्नुभएको थियो।
कार्यक्रमको सञ्चालन तथा सहजीकरण संगम म्याग्दीकी सहायक अधिकृत जीविकोपार्जन अनुषा लामिछानेले गर्नुभएको थियो। उहाँले यस कार्यक्रमबाट कृषकहरूलाई कृषि व्यावसायीकरण र बजारीकरण गर्न सहज हुने बताउनुभएको छ।
