जलजला, जेठ-२६, पर्वत जिल्लाको जलजला गाउँपालिका–३ मल्लाज माझफाँटस्थित भुरतुलामा निर्माण सम्पन्न भएको १० शैया क्षमताको अस्पताल सञ्चालनका विषयमा आइतबार सरोकारवाला निकायहरुबीच छलफल सम्पन्न भएको छ ।
जलजला गाउँपालिका म्याग्दी सदरमुकाम बेनी नजिकैको स्थानीय तह हो । गाउँपालिकाले सार्वजनिक आयोजना अन्तर्गत निर्माण सम्पन्न गरिएको उक्त अस्पताल भवनको खर्च विवरण सार्वजनिक गर्दै आगामी प्रयोग, व्यवस्थापन र सञ्चालनका विषयमा गहन छलफल गरेको हो ।
संघीय सरकारको ‘एक पालिका, एक अस्पताल’ कार्यक्रम अन्तर्गत निर्माण भएको यो अस्पताल भवन भूकम्प प्रतिरोधी र अपाङ्गमैत्री रहेको उपाध्यक्ष दिपक आचार्यले जानकारी दिनुभयो । मल्लाज स्वास्थ्य चौकीको स्तरोन्नति स्वरूप निर्माण गरिएको उक्त भवन अत्याधुनिक सुविधासम्पन्न रहेको बताइएको छ ।
२०७८ साल असार २३ गते काठमाडौंको जिडब्लुसी बिएम आइएस जेभीसँग ९ करोड ६४ हजार ८१३ रुपैयाँमा ठेक्का सम्झौता गरिएकोमा, हालसम्म ८ करोड ३६ लाख ५६ हजार २१७ रुपैयाँ भुक्तानी गरिएको गाउँपालिकाका ईन्जिनियर सुनिल बानियाले जानकारी दिनुभयो ।
भवनमा आकस्मिक कक्ष, बहिरंग तथा अन्तरंग सेवा, शल्यक्रिया कक्ष, प्रसूति तथा लेबर रुम, एक्सरे, इसिजी, प्रयोगशाला, भण्डारण कक्ष, प्रशासनिक कक्ष तथा बैठक कोठासमेत रहने गरी छुट्टाछुट्टै संरचना निर्माण गरिएको छ ।
निर्माण कार्य २०८० असार २३ गते सम्पन्न गर्ने लक्ष्य राखिए पनि जग्गा प्राप्तिमा ढिलाइ र निर्माण कम्पनीको सुरुवाती ढिलासुस्तीका कारण म्याद तेस्रो पटक थप गरिँदै २०८१ चैतमा मात्रै सकिएको हो ।
गाउँपालिका अध्यक्ष राजुप्रसाद आचार्यले अस्पताल सञ्चालनका लागि आवश्यक उपकरण र स्वास्थ्यकर्मीका लागि संघीय तथा प्रदेश सरकारसँग समन्वय भइरहेको बताउनुभयो । नागरिक र सरोकारवालाको सक्रिय सहयोग बिना अस्पताल सञ्चालन असम्भव रहेको उहाँको भनाइ थियो ।
अध्यक्ष आचार्यले मल्लाज स्वास्थ्य चौकीलाई तत्कालै नयाँ भवनमा स्थानान्तरण गर्ने र अस्पताल स्तरोन्नतिको प्रक्रिया अघि बढाउने जानकारी दिनुभयो ।
छलफल कार्यक्रममा वडा नं. २ का अध्यक्ष प्रकाश जिसी, ३ का अध्यक्ष एकिन्द्र क्षेत्री, ४ का अध्यक्ष भरत क्षेत्री, ५ का अध्यक्ष तिलक जिसी, नेपाली काँग्रेसका पालिका सभापति इन्दुप्रकाश पौडेल, एमाले अध्यक्ष नरबहादुर जिसी, माओवादी इञ्चार्ज लोकराज आचार्य, मल्लाज क्षेत्रका अगुवा, स्थानीय जनप्रतिनिधि तथा सर्वसाधारणको उल्लेख्य सहभागिता रहेको थियो ।
जलजला गाउँपालिकाको वडा नं. १, २, ३, ४, ५ र ६ का बासिन्दाहरूले सो अस्पताल सञ्चालनमा आएपछि सहज रूपमा स्थानीय तहमै स्वास्थ्य सेवा प्राप्त गर्न सक्ने अपेक्षा गरिएको छ । यद्यपि वडा नं. ७, ८ र ९ का अधिकांश बासिन्दाहरू भौगोलिक दृष्टिकोणले बेनी, बागलुङ र कुश्माका अस्पतालसम्म पुग्न सहज हुने भएकाले उनीहरूको प्राथमिक पहुँच ती स्थानमै रहेको छ ।
