म्याग्दी, जेठ-२३, म्याग्दीको बेनीमा दलित महिलाहरूको सामाजिक सशक्तीकरण, नेतृत्व क्षमता अभिवृद्धि, र कानुनी जानकारी विस्तार गर्ने उद्देश्यले एकदिने नेतृत्व विकास तालिम सम्पन्न भएको छ । सामाजिक विकास कार्यालय, म्याग्दीको आयोजना तथा बेनी नगरपालिकाको समन्वयमा भएको यस तालिममा बेनी नगरपालिका र रघुगंगा गाउँपालिकाका दलित महिला जनप्रतिनिधिहरूका साथै राजनीतिक दलमा आवद्ध दलित महिलाहरूको उत्साहजनक सहभागिता थियो ।
तालिमको उद्घाटन सत्र सामाजिक विकास कार्यालय म्याग्दीका प्रमुख तारानाथ सुवेदीको अध्यक्षता र बेनी नगरपालिकाकी नगर उपप्रमुख ज्योति लामिछानेको प्रमुख आतिथ्यतामा सम्पन्न भएको थियो । सामाजिक विकास कार्यालय म्याग्दीका प्रमुख तारानाथ सुवेदीले तालिमको मुख्य उद्देश्य दलित महिलाहरूलाई नेतृत्व विकासमा उत्प्रेरित गर्नु, सामाजिक रूपान्तरणमा योगदान दिने क्षमता विकास गर्नु, र सार्वजनिक निर्णय प्रक्रियामा उनीहरूको सहभागिता बढाउनु रहेको जानकारी दिनुभयो ।
अभिमुखीकरण कार्यक्रममा दलित महिला अधिकार, समानता, भेदभाव विरोधी कानुन तथा स्थानीय तहमा पहुँचबारे विस्तृत जानकारी दिइएको थियो । नेपालको संविधानमा उल्लेखित दलित अधिकार, लैङ्गिक समानता तथा भेदभाव निवारणसम्बन्धी कानुनी प्रावधानहरूका साथै स्थानीय तहमा महिला सहभागिताको महत्व, नेतृत्व विकास, निर्णय प्रक्रिया, सामुदायिक सहभागिता, व्यक्तित्व विकास र आत्मविश्वास निर्माणका लागि आत्मपहिचान लगायतका विषयमा गहन छलफल भएको थियो । तालिमका मुख्य सहजकर्ता एवम् नेपाल पत्रकार महासंघका केन्द्रीय परिषद् सदस्य विनोद प्रसाद शर्माले यसको जानकारी गराउनुभएको हो ।
oplus_0
समापन सत्रमा बोल्दै रघुगंगा गाउँपालिकाकी कार्यपालिका सदस्य सम्झना परियार र बेनी नगरपालिकाकी नगर सभा सदस्य पवित्रा किसानले तालिम उपयोगी भएको बताउँदै यस्ता कार्यक्रमलाई निरन्तरता दिन आग्रह गर्नुभयो । उहाँहरूले एक दिनको तालिम उपयोगी भए तापनि समय अपर्याप्त भएको महसुस गरेको उल्लेख गर्नुभयो ।
समापन मन्तव्यमा बेनी नगरपालिकाकी नगर उपप्रमुख ज्योति लामिछानेले तालिमले नेतृत्व विकासको जग खडा गरिदिएको बताउँदै सहभागीहरूलाई अब लक्ष्य निर्धारण गरेर अघि बढ्ने जिम्मेवारी स्वयंले लिनुपर्नेमा जोड दिनुभयो । उहाँले “तालिमले बाटो देखाउँछ, सम्पूर्ण ज्ञान दिन सक्दैन” भन्दै सामाजिक परिवर्तनका लागि आफूमा परिवर्तन गर्न तयार हुनुपर्ने सन्देश दिनुभयो । साथै, उहाँले रघुगंगा गाउँपालिकाका प्रतिनिधिलाई समेत सहभागी गराउन सफल भएकोमा खुसी व्यक्त गर्दै आगामी दिनमा बेनी नगरपालिकाले अझ परिष्कृत र प्रभावकारी क्षमता विकास कार्यक्रम सञ्चालन गर्ने प्रतिबद्धता व्यक्त गर्नुभयो ।
कार्यक्रमको समापनमा आयोजक सामाजिक विकास कार्यालयले सहभागीहरूको सक्रियता र प्रतिबद्धताप्रति आभार व्यक्त गर्दै यस्ता कार्यक्रमलाई निरन्तरता दिइने जानकारी गराएको छ ।
