बेनी, म्याग्दी- भर्खरै नियुक्त भएका ऊर्जा, जलस्रोत तथा सिँचाइ राज्यमन्त्री खमबहादुर गर्बुजाले म्याग्दी जिल्लाको विकासलाई आफ्नो पहिलो प्राथमिकतामा राखेर काम गर्ने प्रतिबद्धता व्यक्त गर्नुभएको छ। आइतबार बेनीमा नेपाली कांग्रेस म्याग्दीले आयोजना गरेको स्वागत, बधाई तथा सम्मान कार्यक्रममा बोल्दै राज्यमन्त्री गर्बुजाले यस्तो धारणा राख्नुभएको हो।
बेनी–दरबाङ सडक खण्ड अन्तर्गत पर्ने फापरखेत पहिरो क्षेत्रमा वैकल्पिक सडक र बेलिब्रिज निर्माणको प्रक्रिया अगाडि बढिसकेको जानकारी उहाँले दिनुभयो। संघीय भौतिक पूर्वाधार तथा यातायात मन्त्रालयमार्फत बेलिब्रिज निर्माण हुने उहाँले बताउनुभयो। पश्चिम म्याग्दी मात्र नभई बागलुङ, पूर्वी रुकुम र डोल्पालाई जोड्ने मंगला गाउँपालिका–३ को पखेर र वडा नम्बर २ को सिमलचौर पुछार जोड्ने म्याग्दी नदीमाथि बेलिब्रिज र सडक निर्माणका लागि आफूले लामो समयदेखि पहल गरिरहेको र अब छिट्टै बेलिब्रिज निर्माणको प्रक्रिया अगाडि बढेको उहाँले जानकारी दिनुभयो।
“वर्षौंदेखिको समस्या समाधान गर्न बेलिब्रिज निर्माणका लागि प्रदेश सरकारका मुख्यमन्त्री सुरेन्द्रराज पाण्डेले सहयोग गरिरहनुभएको छ। लामो समयको प्रयासपछि संघीय सरकारको भौतिक पूर्वाधार तथा यातायात मन्त्रालयले पनि बेलिब्रिज निर्माणको प्रक्रिया अगाडि बढाएको छ,” नेपाली कांग्रेस म्याग्दीका सभापति समेत रहेका राज्यमन्त्री गर्बुजाले बताउनुभयो। उहाँले आफ्नो पहलमा जिल्लामा बेनी बजार चक्रपथ, तातोपानी बजार संरक्षण, बृहत् खानेपानी लगायतका ठूला विकास आयोजनाहरू भित्रिएको स्मरण गराउँदै आफ्नो कार्यकालमा थप विकास बजेट भित्र्याउने प्रयास जारी राख्ने बताउनुभयो।
कार्यक्रममा संविधानसभा सदस्य रेशमबहादुर बानियाँ, उपसभापतिद्वय हरिकुमार श्रेष्ठ र केवी भण्डारीले राज्यमन्त्री गर्बुजालाई बधाई तथा सफल कार्यकालको शुभकामना दिनुभएको थियो। बेनी नगरपालिका परिसरदेखि संगमचोकस्थित पार्टी कार्यालयसम्म नेता, कार्यकर्ता, शुभेच्छुक लगायतले बाजागाजा र र्यालीसहित भव्य स्वागत गरेका थिए। पार्टी कार्यालयमा नेपाली कांग्रेस म्याग्दीको तर्फबाट बधाईसहितको सम्मानपत्र प्रदान गरिएको थियो। पार्टी जिल्ला सचिव हिराबहादुर पुनले कार्यक्रम सञ्चालन गर्नुभएको थियो।
