पर्वत, जेठ ४ गते – जलजला गाउँपालिकाले लोपोन्मुख अवस्थामा रहेको परम्परागत बाजा मादलको संरक्षण गर्ने उद्देश्यले मादल बजाउने तालिम सुरु गरेको छ। गाउँपालिकाको आयोजनामा आइतबारदेखि वडा नम्बर ३ को कार्यालयको सभाहलमा एक हप्ते तालिमको शुभारम्भ भएको हो।
गाउँपालिकाका उपप्रमुख दिपक आचार्यले तालिमको उद्घाटन गर्दै मादल नेपालीको परम्परागत बाजा भएको र यसको कला हराउँदै गएकोमा चिन्ता व्यक्त गर्नुभयो। उहाँले तालिमले यस कलाको संरक्षणमा टेवा पुग्ने र गाउँघरमा भजन, कीर्तन जस्ता शुभकार्यमा मादल बजाउने व्यक्तिको अभाव हट्ने विश्वास व्यक्त गर्नुभयो।
कार्यक्रममा वडा नम्बर ४ का अध्यक्ष भरत जिसीले गाउँपालिकाको यो पहल प्रभावकारी रहेको बताउनुभयो। उहाँले सबै वडाका महिला समूहको प्रतिनिधित्व हुने गरी सहभागी गराइएकोमा खुसी व्यक्त गर्नुभयो।
तालिममा जलजला गाउँपालिका वडा नम्बर १, २, ३ र ४ का ५६ जना महिलाहरूको सहभागिता रहेको छ। तालिमको सहजीकरण कृष्ण जिसीले गरिरहनुभएको छ। जलजला गाउँपालिकाले यस तालिम लगत्तै वडा नम्बर ५ र ६, त्यसैगरी ७, ८ र ९ मा समेत सञ्चालन गरिने जनाएको छ।
तालिम उद्घाटन कार्यक्रम जलजला गाउँपालिकाको महिला, बालबालिका तथा ज्येष्ठ नागरिक शाखा प्रमुख बिन्दु शर्माको सञ्चालनमा सम्पन्न भएको थियो भने स्वागत वडा नम्बर ३ की वडा सदस्य सुनिता खत्रीले गर्नुभएको थियो।
