देवी जिसी /म्याग्दी बैशाख-२८, गण्डकी प्रदेशमा म्याग्दी पहिलो पूर्णखोप सुनिश्चित जिल्ला घोषित भएको छ। “पूर्णखोप सुरक्षित भविष्य, स्थानीय स्रोतको उपयोग स्वामित्व र सहभागिता, पूर्णखोप सुनिश्चितता जिल्ला हाम्रो प्रतिबद्धता” भन्ने मूल नाराका साथ वैशाख २८ गते आइतबार सदरमुकाम बेनीमा एक समारोहको आयोजना गरी पूर्णखोप सुनिश्चित जिल्ला घोषणा गरिएको हो।
जिल्लामा जन्मेदेखि १५ महिनासम्मका १,२३५ जना बालबालिकाहरू नियमित खोप लगाइरहेका छन्। त्यसैगरी १६ महिनादेखि २७ महिनासम्मका ३६३ र १६ देखि ५९ महिनासम्मका ३,२८८ जना बालबालिकाहरूले पूर्णखोप पाएको सुनिश्चितता गरिएको छ।
प्रदेश जनस्वास्थ्य कार्यालय म्याग्दीका प्रमुख भूवन ठकुराठीका अनुसार, बालबालिकाहरूले जन्मेपछि पोलियो, दादुरा, हेपाटाइटिस, जापानीज इन्सेफ्लाइटिस, रुबेला, झाडापखाला, धनुष्टंकार र टाइफाइडलगायत रोगविरुद्ध पाउनुपर्ने १४ प्रकारका खोपको सबै मात्रा पूरा गरेका छन्।
तस्विर : जलजला अनलाइन
जिल्लाको सम्पूर्ण घरधुरीमा सर्वेक्षणसहित ५९ महिनासम्मका सबै बालबालिकाहरूको विवरण संकलन गरी उनीहरूलाई पूर्णखोप लगाउनुका साथै पुनः सर्वेक्षण समेत गरिएको थियो।
कार्यक्रमको अवसरमा पूर्णखोप अभियानमा खटिएका स्वास्थ्यकर्मी, स्वास्थ्य संस्थाहरू र पत्रकार महासंघलाई प्रशंसापत्रसहित सम्मान गरिएको थियो। साथै लामो समयसम्म सेवा गरेका विभिन्न पालिकाका ६ जना महिला स्वयंसेविकालाई दोसल्ला ओढाएर सम्मान गरिएको थियो।
गण्डकी प्रदेशका पूर्वमन्त्री एवं प्रदेश सभा सदस्य रेशमबहादुर जुग्जालीले कार्यक्रमको उद्घाटन गर्दै प्रदेशभरी नै म्याग्दीलाई पहिलो पूर्णखोप सुनिश्चित जिल्ला बनाउने अभियानमा खटेका सबैलाई धन्यवाद दिनुभयो। उहाँले मानव जीवनमा स्वास्थ्य सबैभन्दा महत्त्वपूर्ण भएकाले प्रदेश सरकारले बजेट विनियोजन गर्दा स्वास्थ्य क्षेत्रलाई प्राथमिकता दिएको बताउनुभयो।
कार्यक्रममा म्याग्दीका प्रमुख जिल्ला अधिकारी गुरुदत्त ढकाल लगायत विभिन्न राजनीतिक दलका प्रतिनिधिहरूले आगामी दिनमा पनि जिल्लालाई पूर्णखोप सुनिश्चितता र दिगोपना कायम राख्न निरन्तर लाग्नुपर्नेमा जोड दिनुभयो।
कार्यक्रममा स्वास्थ्यकर्मी र सामुदायिक महिला स्वास्थ्य स्वयंसेविकाहरूले सन्देशमूलक गीत र नृत्य प्रस्तुत गरेका थिए।
