पर्वहरुको पनि पर्व होली पर्व : सबैभन्दा महान पर्व

वसन्त ऋतुको आगमनसंगै फाल्गुण शुक्ल पुर्णिमाको अवसर पारेर नेपाल र भारत लगायत बिश्वका सम्पूर्ण हिन्दु समुदायमाझ बढो हर्सोल्लासपूर्ण रुपमा मनाईने एउटा महत्त्वपूर्ण धार्मिक पर्व हो होलि। रंगको पर्व भनेर पनि चिनिने यो पर्वमा मानिसहरूले एक आपसमा विभिन्न थरी रङहरुले एक अर्कालाई रंग्याउंदै आपसी स्नेह, सद्भाव एवं भाईचाराको सम्बन्धलाई अझ मजवुत बनाउँदछ्न। नेपालमा विशेष गरि होलिलाई दूई दिन गरेर मनाईने गरिन्छ। नेपालको तराई क्षेत्रमा यस पर्वलाई धूमधामका साथ मनाएकै भोलिपल्ट पहाडी क्षेत्रमा पनि उसैगरी यस पर्वलाई मनाईने गरिन्छ। मनोरंजनका रुपमा पनि लिईने यस पर्वलाई पछिल्लो समयमा आएर अझ बिराट एवं परिष्कृत रुपमा मनाईंदै आएको छ भने कतिपय क्षेत्रमा अन्य धर्मावलम्विहरुले यस पर्वलाई साथ साथ मनाउँदै आएको पाईन्छ।

होली खेल्नुभन्दा ठिक अंघिल्लो दिन होलिकालाई दहन गर्ने प्रचलन रहिआएको छ। होलीकालाई दहन गरिसके पछि अर्कोदिन बिहान पानीमा विभिन्न प्रकारका रङ्गहरु घोलेर एक अर्कामाथि छ्याप्ने प्रचलन रहिआएको छ। हात हातमा विभिन्न रंगमिश्रीत रंगेली लिएर परम्परागत फागु गीत गाउँदै, नाच्दै बालबालिका, युवायुवती देखि लिएर वृद्ध-वृद्धा सम्म सबैले एकसाथ होलिलाई अत्यन्तै उत्साहका मनाउने गर्दछन।यस पर्वका आफ्नै धार्मिक सांस्कृतिक महत्व छन् तैपनि यहाँ संक्षिप्तमा सबैभन्दा उत्तम पर्व होलि कसरी हो भन्ने विषयमा केहि प्रसङ्ग प्रस्तुत गर्दैछु  ।

हिन्दु धर्मावलम्बीले मनाउने धेरै चाडहरु मध्ये होली/फागुपर्व सबैभन्दा उत्तम  पर्व हो भन्ने  मेरो ठम्याई हो । हुन त बडा दशैंलाई सबैभन्दा ठुलो चाड भन्ने गरिएको छ भने तिहार दोश्रो । त्यसैगरी आफ्ना जाति र सम्प्रदाय अनुसारका आफ्नै चाडपर्वहरु छन् तर सबै चाड भन्दा होलि नै उत्तम अनि महान चाड हो  किन र कसरी हो भन्ने बिषयमा मैले देखेका केहि यथार्थ यस्ता छन्   ।

हामीले अधिकांश चाडहरु/पर्वहरु आफ्नै परिवार, आफन्त, नातागोता, कुल बंशको बिचमा मनाउने गर्दछौं । जातीय सम्प्रदाय अनुसार त्यहि भित्र मनाउछौं तर होलि मात्रै यस्तो चाड हो जहाँ  कुनै जाति सम्प्रदाय भित्र हैन सबै एकै ठाउँमा भेला भएर रंग संगै  रंगिन बनाउदछौ ।  होलीमा रंग संग खेल्दा न त्यहाँ कुनै जात छ न त्यहाँ कुनै वर्ग छ न त्यहाँ कुनै सम्प्रदाय छ सबै एकै हुन्छ उमङ्गको बहार ।  त्यसैले होलि नै त्यस्तो पर्व हो जसले सबै जाती भाषा वर्ग पेशा र सम्प्रदायका मानिसलाई एकै थलोमा ल्याएर रंगिन बनाउदछ  । होलीको शुभकामना !!!