पाल्पा, साउन-८, पाल्पाको रिब्दीकोट गाउँपालिका वडा नं २ लघुवामा भएको बस दुर्घटनामा ६ जनाको मृत्यु भएको छ भने १७ जना घाइते भएका छन् । आज अपराह्न ४ बजेतिर बुर्तिबाङबाट बुटवल जाँदै गरेको लु १ ख ५९५२ नम्बरको बस पाल्पाको रिब्दिकोट गाउँपालिका–३ स्थित लघुवामा दुर्घटना भएको हो ।
जिल्ला प्रहरी कार्यालयले तानसेन–रिडी–तम्घास सडकखण्डको तोसडाँडा ढिकबाट यात्रुसहितको बस खसेर दुर्घटनाग्रस्त भएको जनाएको छ । स्थानीय प्रत्यक्षदर्शी रन्जीवकुमार कुँवरले दुर्घटनामा घाइते भएका १७ जनाको युनाइटेड मिसन अस्पताल तानसेनमा उपचार भइरहेको जानकारी दिए । दुर्घटनामा बाग्लुङ, गुल्मी र रुपन्देहिका यात्रु परेको बताइएको छ ।
घटनास्थलमा रहेका घाइतेका अनुसार अर्को बसलाई साइड दिने क्रममा बस दुर्घटनामा परेको थियो । वडा नं २ का वडाध्यक्ष ओमप्रसाद पोखरेलका अनुसार घाइतेलाई उद्धार गरी पाल्पा मिसनमा पठाइएको र उनीहरूमध्ये केहीको अवस्था गम्भीर रहेको छ ।
