म्याग्दीको बेनी नगरपालिकाले करिव ७३ करोडको बजेट ल्यायो

बेनी, असार-७,  म्याग्दीको बेनी नगरपालिकाले आव ०८१/०८२ को आयब्यय विवरण, निती, कार्यक्रम एवं आर्थिक विधयक सार्वजनिक गरेको छ ।शुक्रबार  जिल्ला समन्वय समितिको सभाहलमा आयोजित बेनी नगरपालिकाको नगर सभाको १५ औं अधिवेशनमा उपप्रमुख ज्योती लामिछानेले आयब्यय विवरण, निती, कार्यक्रम प्रस्तुत गर्नुभएको हो । उहाँले  संघ/प्रदेश सरकारबाट प्राप्त हुने समन्यीकरण तथा सर्सत अनुदान, राजश्व बाँडफाँड र पालिकाको आन्तरिक आय एवं मौजादगरी कुल ७२ करोड ७८ लाख १३ हजारको बजेट सार्वजनिक गर्नुभएको हो ।

बेनी नगरपालिकाले प्रस्तुत गरेको  आव ०८१/८२ को बार्षिक आयब्ययको विवरणमा कुल बजेटको ६९ प्रतिशत चालु (प्रशासनीक) तर्फ र पुँजीगत (विकास तर्फ) ३१ प्रतिशत खर्च हुने अनुमान गरिएको छ । नगरपालिकाले आगामी बर्ष आन्तरिक आय जम्मा ५ करोड मात्र हुने प्रक्षेपण गरेको छ ।

बजेटमा आर्थिक विकास तर्फ ३ करोड ४१ लाख ३५ हजार, कृषी तर्फ ६२ लाख ६० हजार, पशुपंक्षी तर्फ ४७ लाख १० हजार, सिंचाई, खानेपानी तर्फ ४९ लाख, उद्योगमा १८ लाख, पर्यटन प्रर्वद्धनमा १ करोड ४ लाख, रोजगार प्रर्वद्धनमा ९ लाख बजेट विनियोजन भएको छ । त्यस्तै सामाजिक विकास तर्फ नगर तथा वडा योजनकालागी ३८ करोड ८८ लाख २९ हजार, शिक्षा, खेलकुद तर्फ २ करोड ३५ लाख, स्वास्थ्य तर्फ ५९ लाख ५० हजार बजेट विनियोजन भएको छ। पूर्वाधार विकास तर्फ कुल बजेटको २१ प्रतिशत बजेट रहेको छ ।

सुशासन तर्फ भने कार्यालय तथा वडा कार्यालय ब्यवस्थापन, कर्मचारी, जनप्रतिनिधी सुविधामा १२ करोड ३१ लाख ७५ हजार बजेट विनियोजन गरिएको छ।

त्यसैगरी  निती तथा कार्यक्रममा कृषी, पशुपंक्षी तर्फ ‘कृषी उत्पादनमा बृद्धि: बेनी नगरको समृद्धि’ नारा तयगरी निशुल्क कृषी तथा पशु वीमा कार्यक्रम लागु गर्ने भएको छ । वडा विशेष उत्पादनमा वडा नं १ ले तेलहन तथा तरकारी, २ ले केरा, चिया, तरकारी, ३ ले सुन्तला, आलु, किवी खेती, ४ ले खाद्यान्न, तरकारी, ५ ले खाद्यान्न तथा फलफुल, ६ ले दुध, ७ ले मासु ८ ले अण्डा, ९ ले टिमुर, सुन्तला, केरा र १० ले आलु खेतीमा जोड दिने उल्लेख छ
त्यस्तै विद्यालयमा हामी सक्छौं हामी गर्छौं, एक वडा एक पर्यटन परियोजना, समृद्ध पर्यटकीय बेनी नगर, प्रशिक्षित अध्यापकः प्रतिस्पर्धी प्रधानअध्यापक, ग्रीन स्कुल, क्लीन स्कुल, जेष्ठ नागरिकको घरघरमा स्वास्थ्यकर्मी, नसर्ने रोगको निशुल्क परीक्षण, शान्ति पार्कमा साहित्य डबली बनााउने समेतका कार्यक्रम प्रस्तुत भएका छन ।

बजेट सार्वजनिक हुनु अघि बेनी नगरप्रमुख सुरत केसीले प्रस्तुत गरेको आव ०८१/८२ को बजेट नीति तथा कार्यक्रम पेस भै सभाबाट पारित भएको थियो ।