बेनी, असोज-२१, म्याग्दीको सदरमुकाम बेनीस्थित म्याग्दी पुस्तकालयलाई बेनी समाज काठमाडौंले तीन सयभन्दा बढी पुस्तक सहयोग गरेको छ। बेनीबाट व्यवसाय, पेशा र रोजगारीका सिलसिलामा राजधानीमा रहेका बेनीवासीहरूको साझा संस्था बेनी समाजका पूर्वअध्यक्ष याम श्रेष्ठ र सदस्य महेन्द्र बानियाँले विविध विधाका पुस्तकहरू पुस्तकालयका अध्यक्ष अम्बिक श्रेष्ठलाई हस्तान्तरण गर्नुभएको हो।
पुस्तक हस्तान्तरण कार्यक्रममा बोल्दै पूर्वअध्यक्ष याम श्रेष्ठले पुस्तकालयको स्थापना र सञ्चालनमा तत्कालीन समयमा खेलेको भूमिकाको स्मरण गर्दै आगामी दिनमा पनि पुस्तकालयलाई निरन्तर सहयोग गर्ने प्रतिबद्धता जनाउनुभयो।
त्यसैगरी, म्याग्दी पुस्तकालयका अध्यक्ष अम्बिक श्रेष्ठले बजारमा प्रकाशित चर्चित पुस्तकहरूका माध्यमबाट पाठकलाई आकर्षित गर्न प्रयास भइरहेको बताउनुभयो। उहाँले पुस्तकालयमा धार्मिक, कानुनी तथा अन्य विधाका पुस्तक थप्ने, संगीत कक्ष र सभाहल स्थापना गर्ने योजना रहेको जानकारी दिंदै सहयोगका लागि अनुरोध गर्नुभयो।
पुस्तक हस्तान्तरण कार्यक्रम सचिव नवराज पौडेलको सञ्चालनमा सम्पन्न भएको थियो। कार्यक्रममा उपाध्यक्ष सुमन पौडेल, कोषाध्यक्ष हरिकृष्ण गौतम, सदस्य हरिप्रसाद पौडेललगायतको उपस्थिती रहेको थियो।
म्याग्दी पुस्तकालय शनिबार तथा सार्वजनिक विदाका दिनमा समेत खुला रहन्छ। पुस्तकालयमा बाल सामग्रीदेखि धार्मिक, साहित्यिक, अङ्ग्रेजी, हिन्दी लगायतका विविध विधाका पुस्तकहरू सहित करिब ९ हजारभन्दा बढी पुस्तक र श्रव्य–दृश्य सामग्रीहरू उपलब्ध छन्।
