म्याग्दी, असोज-४, संगम म्याग्दीको सहजीकरण तथा सहयोग र जनकल्याण माध्यमिक विद्यालयको आयोजनामा विद्यालय रूपान्तरणका लागि आयोजित तीन दिने पूर्वतयारी कार्यशाला गोष्ठी सम्पन्न भएको छ।
बेनी नगरपालिका–५, पुलाचौरस्थित जनकल्याण माध्यमिक विद्यालयमा शुक्रबारदेखि सुरु भएको कार्यशालामा विद्यालयको शैक्षिक गुणस्तर अभिवृद्धि, दीर्घकालीन विकास, संस्थागत क्षमता सुदृढीकरण तथा विद्यालयको समग्र सुधारका विषयमा केन्द्रित रहेर छलफल तथा योजना निर्माण गरिएको थियो।
कार्यशालामा विद्यालयलाई समयानुकूल, प्रभावकारी र गुणस्तरीय शैक्षिक संस्थाका रूपमा विकास गर्न आवश्यक रणनीति, प्राथमिकता तथा आगामी कार्यदिशाबारे सहभागीबीच छलफल गरिएको थियो। विद्यालयको वर्तमान अवस्था पहिचान गर्दै आगामी दिनमा गर्नुपर्ने सुधारका क्षेत्रहरू निर्धारण गर्ने, उपलब्ध स्रोत–साधनको प्रभावकारी उपयोग गर्ने तथा विद्यालय विकासलाई योजनाबद्ध रूपमा अघि बढाउने विषयमा समेत कार्यशालाले जोड दिएको थियो।
कार्यशालामा विद्यालय रूपान्तरणको पाँचवर्षीय योजना निर्माण तथा कार्यान्वयनका विषयमा विशेष सहजीकरण गरिएको थियो। पाँच वर्षको अवधिमा विद्यालयको शैक्षिक, भौतिक, व्यवस्थापकीय तथा सामाजिक पक्षमा गर्नुपर्ने सुधारलाई योजनाबद्ध रूपमा अघि बढाउने उद्देश्यले विभिन्न विषयमा छलफल गरिएको जनाइएको छ।
पाँचवर्षीय योजना कार्यक्रमको सहजीकरण डा. रामबहादुर रावतले गर्नुभएको थियो। उहाँले विद्यालय रूपान्तरण केवल भौतिक पूर्वाधार विकासमा सीमित नभई शिक्षण सिकाइको गुणस्तर, विद्यार्थीको सिकाइ उपलब्धि, शिक्षकको क्षमता विकास, विद्यालय व्यवस्थापन, अभिभावक तथा समुदायको सहभागितासहित समग्र पक्षको सुधारसँग जोडिनुपर्नेमा जोड दिनुभएको थियो।
कार्यशालामा विद्यालय व्यवस्थापन समिति, शिक्षक तथा सरोकारवालाहरूको सहभागिता रहेको थियो। सहभागीहरूले विद्यालयको वर्तमान अवस्था, चुनौती तथा सम्भावनाका विषयमा अनुभव आदानप्रदान गर्दै आगामी दिनमा विद्यालयलाई थप प्रभावकारी र नमुना शैक्षिक संस्थाका रूपमा विकास गर्न आवश्यक योजना तथा कार्यक्रमका बारेमा छलफल गरेका थिए।
तीन दिनसम्म सञ्चालन भएको कार्यशालाले विद्यालयको दीर्घकालीन विकासका लागि स्पष्ट दृष्टिकोण र कार्ययोजना निर्माण गर्न सहयोग पुगेको विद्यालयले जनाएको छ। कार्यशालाबाट तयार भएको योजनालाई आगामी दिनमा प्राथमिकताका आधारमा कार्यान्वयन गर्दै विद्यालयको शैक्षिक गुणस्तर तथा समग्र विकासमा निरन्तरता दिने लक्ष्य राखिएको छ।
विद्यालय रूपान्तरणको अभियानलाई प्रभावकारी बनाउन विद्यालय, शिक्षक, विद्यार्थी, अभिभावक, समुदाय तथा सम्बन्धित सरोकारवाला निकायबीच सहकार्य र समन्वय आवश्यक रहेकोमा समेत कार्यशालाले जोड दिएको छ।
