गैरागाउँदेखि विदेशसम्मको माया: देवीस्थान विद्यालयलाई ८ लाख ५४ हजारको सहयोग

  जलजला, भदौ-२६,  पर्वतको जलजला–५, लेखफाँट गैरागाउँस्थित देवीस्थान आधारभूत विद्यालयमा विद्यार्थीलाई पोशाक तथा शैक्षिक सामग्री वितरण, सहयोगदातालाई सम्मान र सेवानिवृत्त शिक्षकलाई सम्मानसहित बिदाइ कार्यक्रम सम्पन्न भएको छ।

गैरागाउँमा जन्मिएर देश तथा विदेशका विभिन्न स्थानमा रहेका व्यक्तिहरूबाट प्राप्त सहयोग रकम तथा सामग्री बिहीबार विद्यालयमा आयोजित एक कार्यक्रमबीच हस्तान्तरण तथा वितरण गरिएको हो।

विद्यालय व्यवस्थापन समितिका पूर्वअध्यक्ष प्रकाश जिसी र वडा अध्यक्ष तिलकबहादुर जिसीको पहलमा वडा कार्यालय तथा विभिन्न सहयोगदाताबाट गरी ८ लाख ८२ हजार ३ सय ४३ रुपैयाँ संकलन भएको जनाइएको छ।

संकलित रकममध्ये वडा कार्यालयबाट प्राप्त सहयोग भौतिक पूर्वाधार विकासमा तथा अन्य सहयोगदाताबाट प्राप्त रकम सहयोगदाताहरूले तोकेको शीर्षकअनुसार प्रयोग गरिएको विद्यालयले जनाएको छ।

विद्यालयले सार्वजनिक गरेको विवरणअनुसार २०८०/८१ देखि २०८३ साल भदौ २४ गतेसम्म विभिन्न शीर्षकमा ८ लाख ५४ हजार ५ सय ३३ रुपैयाँ सहयोग प्राप्त भएको छ। उक्त रकम पूर्वाधार निर्माण, निजी शिक्षक व्यवस्थापन, विद्यार्थीको पोशाक तथा स्टेशनरी, विद्यालय व्यवस्थापन, शैक्षिक सामग्री, गाडी ढुवानी सेवा र खेलकुद सामग्रीलगायतका क्षेत्रमा खर्च गरिएको जनाइएको छ।

विद्यालयका अनुसार सहयोग गर्नेहरूमा जलजला गाउँपालिका–५ वडा कार्यालयबाट ३ लाख ५० हजार रुपैयाँ, भूमिराज तथा बालकुमारी घर्ती क्षेत्रीबाट ५५ हजार, प्रकाश थापाबाट ५१ हजार १ सय ११, राजकुमार थापाबाट ५० हजार ४ सय ६४, ध्रुव रेग्मीबाट ५० हजार, विनोद पौडेलबाट ४५ हजार र नविन पौडेलबाट ४५ हजार रुपैयाँ सहयोग प्राप्त भएको छ।

त्यस्तै, कमल रेग्मीबाट ३१ हजार १ सय ३१, सुमन जिसीबाट २६ हजार ४ सय ९१, भूपेन्द्र जिसीबाट २० हजार, नमुना जिसी केसीबाट १५ हजार ५ सय ५५, रेशम सुवेदीबाट १५ हजार, प्रतिक्षा रेग्मीबाट १२ हजार, नवराज जिसीबाट ११ हजार १ सय ११, भूपेन्द्र रेग्मीबाट ११ हजार १ सय ११, प्रकाश पौडेलबाट १० हजार ९९ र सृष्टि बरालबाट १० हजार रुपैयाँ सहयोग प्राप्त भएको विद्यालयको विवरणमा उल्लेख छ।

यसैगरी शिवजी रेग्मी, धनबहादुर जिसी र तेजेन्द्र जिसीबाट जनही ६ हजार रुपैयाँ, प्रकाश परियारबाट ६ हजार, शिव पौडेलबाट ५ हजार ५ सय ५५, सुनिल जिसीबाट ५ हजार ९ सय, इन्द्रबहादुर जिसीबाट ५ हजार ५ रुपैयाँ र कमल पौडेलबाट ५ हजार रुपैयाँ सहयोग प्राप्त भएको विद्यालयले जनाएको छ।

सहयोगदातामध्ये काठमाडौं, पोर्चुगल, अमेरिका, अष्ट्रेलिया, बेल्जियम, यूके, इराक, कोरिया लगायतका देश तथा विभिन्न स्थानमा रहेका गैरागाउँमा जन्मिएका व्यक्तिहरू रहेका छन्।

विद्यालयको विकास र शैक्षिक गुणस्तर सुधारका लागि स्थानीय तथा विदेशमा रहेका पूर्वविद्यार्थी, अभिभावक र शुभेच्छुकबाट प्राप्त सहयोगले महत्वपूर्ण योगदान पुर्‍याएको विद्यालयले जनाएको छ। सहयोगबाट निजी स्रोतका शिक्षक व्यवस्थापनदेखि विद्यार्थीलाई पोशाक, शैक्षिक सामग्री तथा विद्यालयका अन्य आवश्यकताहरू पूरा गर्न सहज भएको बताइएको छ।

कार्यक्रममा विद्यालयको विकासमा योगदान पुर्‍याउने सहयोगदाताहरूलाई सम्मान गरिएको थियो भने सेवानिवृत्त शिक्षकलाई सम्मानसहित बिदाइ गरिएको थियो।

विद्यालयले सहयोगदाताहरूबाट प्राप्त रकम तथा सामग्रीलाई सम्बन्धित शीर्षक र विद्यालयको आवश्यकताअनुसार पारदर्शी रूपमा सदुपयोग गर्दै आएको जनाएको छ।