पर्वत, भदौ-२१,
पर्वतको जलजला गाउँपालिका–७, मिलनचोकमा सञ्चालित मार्कण्डेय उद्यमशील सहकारी संस्था लिमिटेडको ११औँ वार्षिक साधारणसभा सम्पन्न भएको छ।
आइतबार सम्पन्न साधारणसभामा सहकारीले आर्थिक वर्ष २०८२/०८३ मा करिब सात करोड रुपैयाँ बराबरको आर्थिक कारोबार गरेको जानकारी गराइएको छ। सहकारीमा हाल ८ सय ९४ जना शेयर सदस्य आबद्ध रहेका छन्।
महिला शेयर सदस्यलाई उद्यमशील बनाउँदै आत्मनिर्भर बनाउने उद्देश्यले सहकारीले सुलभ ब्याजदरमा कर्जा लगानी गर्ने र उद्यमशील कर्जामा ३० प्रतिशत अनुदान दिने निर्णय गरेको छ।
त्यस्तै, शेयर सदस्यहरूको आवश्यकता, चाहना र उद्यमशीलतालाई लक्षित गर्दै नयाँ बचत तथा कर्जा योजना समेत सार्वजनिक गरिएको सहकारीले जनाएको छ।
सदस्यहरूलाई संस्थासँगको कारोबार बढाउन प्रोत्साहित गर्ने उद्देश्यले कारोबारका आधारमा मुनाफा वितरण गर्ने अभ्याससमेत सुरु गरिएको छ। यस वर्षदेखि संरक्षित पुँजी फिर्ता कोष अन्तर्गत सदस्यहरूको बचत र कर्जाबाट संस्थाले प्राप्त गरेको ब्याजलाई आधार बनाएर मुनाफा वितरण गर्न थालिएको शेयर सदस्य तथा सामाजिक अभियन्ता जमुना आचार्यले बताउनुभएको छ।
साधारणसभाको उद्घाटन ज्येष्ठ शेयर सदस्य ७३ वर्षीया धर्मकुमारी जैसीले दीप प्रज्वलन गरी गर्नुभएको थियो। साधारणसभाको अवसरमा विभिन्न विधामा उत्कृष्ट योगदान तथा उपलब्धि हासिल गर्ने शेयर सदस्यहरूलाई सम्मानसमेत गरिएको छ।
नियमित बचततर्फ माया सार्की र मायान्सी सुवेदी, १५ वर्षे बचततर्फ जेनी शर्मा र जमुना दर्जी, गृहलक्ष्मी बचततर्फ निलकुमारी शर्मा र उषा मल्ल, बाल बचततर्फ सद्भाव पौडेल र आयान केसी सम्मानित हुनुभएको छ।
त्यस्तै, दैनिक बचततर्फ दुर्गाकुमारी पौडेल आचार्य, सामूहिक ऋणतर्फ डिलकुमारी सार्की र गीता दर्जी तथा धितोतर्फ खिनदेवी दर्जी र पार्वती सार्की सम्मानित हुनुभएको छ।
सम्मानका लागि मायाको चिनोका रूपमा सहकारीकै शेयर सदस्यले उत्पादन गरेको स्थानीय ढाकाको सल प्रयोग गरिएको थियो। स्थानीय उत्पादनलाई प्रोत्साहन गर्ने उद्देश्यले आगामी दिनमा पनि शेयर सदस्यहरूले उत्पादन गरेका वस्तुलाई प्राथमिकता दिने सहकारीले जनाएको छ।
यसैगरी, उत्कृष्ट उद्यमीका रूपमा टपरी एग्रोका सञ्चालक जमुना आचार्यलाई सम्मान गरिएको छ। सहकारीले बचत तथा ऋणको कारोबारसँगै शेयर सदस्यलाई उद्यमी बनाउने, स्थानीय उत्पादनको प्रवद्र्धन गर्ने र सदस्यहरूको आर्थिक अवस्थामा सुधार ल्याउने योजना अघि सारेको छ।
भावी योजनाअन्तर्गत दीर्घरोगीलाई आर्थिक सहयोग, एकल महिला तथा उत्कृष्ट सासु–बुहारी सम्मान, उत्कृष्ट उद्यमी प्रोत्साहन, आपत्विपद्मा परेकालाई राहत वितरण तथा सर्वोत्कृष्ट कर्मचारीलाई सम्मान गर्ने कार्यक्रम पारित गरिएको छ।
त्यस्तै, उत्कृष्ट अङ्कसहित उत्तीर्ण हुने शेयर सदस्यका छोराछोरीलाई सम्मान गर्ने लगायतका कार्यक्रमसमेत साधारणसभाले पारित गरेको शेयर सदस्य जमुना आचार्यले जानकारी दिनुभएको छ।
तस्विर : जलजला अनलाइन
