म्याग्दी, भदौ-२१, म्याग्दीको बेनीमा रहेको न्यु वेष्ट पोइन्ट आवासीय माध्यमिक विद्यालयले कक्षा २ देखि १० सम्म अध्ययनरत विद्यार्थीका अभिभावकलाई लक्षित गरी अभिभावक सचेतना कार्यक्रम सञ्चालन गरेको छ।
भदौ २१ गते आइतबार नेपाल भाषा मंकाःखलको हलमा आयोजित कार्यक्रम दुई चरणमा सञ्चालन गरिएको थियो। बिहान १०ः३० बजेदेखि सुरु भएको पहिलो चरणको कार्यक्रममा कक्षा २ देखि ६ सम्म अध्ययनरत विद्यार्थीका अभिभावकलाई सहभागी गराइएको थियो भने दिउँसो ३ बजेदेखि कक्षा ७ देखि १० सम्मका विद्यार्थीका अभिभावकलाई लक्षित गरी दोस्रो चरणको कार्यक्रम सञ्चालन गरिएको विद्यालयले जनाएको छ।
कार्यक्रममा सचेतक इश्वर गैह्रेले सहजीकरण गर्नुभएको थियो। राष्ट्रियगानबाट सुरु भएको कार्यक्रममा यही भदौ १० गते भोटेकोशीमा आएको बाढीका कारण रसुवा, नुवाकोट, धादिङ, गोरखा, चितवनलगायतका क्षेत्रमा ज्यान गुमाउनु भएका व्यक्तिहरूको स्मरणमा एक मिनेट मौनधारणसमेत गरिएको थियो।
पहिलो चरणमा कक्षा ६ सम्म अध्ययन गर्ने करिब ९ देखि १० वर्ष उमेर समूहका बालबालिकाको मनोविज्ञान, उनीहरूको व्यवहार तथा अभिभावकले बालबालिकालाई बुझ्नुपर्ने विषयमा प्रशिक्षण दिइएको थियो।
त्यस्तै, दोस्रो चरणमा कक्षा ७ देखि १० सम्मका विद्यार्थीका अभिभावकलाई लक्षित गरी बालमनोविज्ञान, बालबालिकासँग अभिभावक कसरी जोडिने, उनीहरूको निगरानी कसरी गर्ने तथा बालबालिकाको स्वभाव र अभिभावकका विभिन्न प्रकारका विषयमा प्रशिक्षण प्रदान गरिएको थियो।
प्रशिक्षणका क्रममा विषयअनुसार विभिन्न रचनात्मक खेल तथा गतिविधिसमेत सञ्चालन गरिएको थियो। खेल तथा प्रयोगात्मक गतिविधिमार्फत अभिभावकलाई बालबालिकाको मनोविज्ञान र व्यवहारलाई नजिकबाट बुझ्ने अवसर प्रदान गरिएको आयोजकले जनाएको छ।
कार्यक्रम वेष्ट पोइन्ट एजुकेशन एण्ड फाउन्डेसन म्याग्दी प्रालिका अध्यक्ष कृष्णप्रसाद श्रेष्ठको अध्यक्षतामा सम्पन्न भएको थियो। विद्यालयका प्रिन्सिपल डिबी दाहालले स्वागत गर्नुभएको कार्यक्रमको सञ्चालन आईएसओ फोकल पर्सन दीप्ती श्रेष्ठले गर्नुभएको थियो।
