म्याग्दी, भदौ-१५, डिजिटल प्रविधिको बढ्दो प्रयोगसँगै साइबर ठगी तथा अनलाइन स्क्यामको जोखिम बढ्दै गएपछि वित्तीय साक्षरता र डिजिटल सुरक्षासम्बन्धी सचेतनामा जोड दिइएको छ।
म्याग्दीको वेस्ट प्वाइन्ट माध्यमिक विद्यालयमा कक्षा ११ र १२ का विद्यार्थीलाई लक्षित गरी वित्तीय साक्षरता कार्यक्रम सञ्चालन गरिएको छ। विद्यार्थीलाई पैसा बचत गर्ने र लगानी गर्ने ज्ञानसँगै डिजिटल कारोबारमा अपनाउनुपर्ने सावधानीबारे जानकारी गराइएको हो।
कार्यक्रममा बैंकर्स क्लब अफ म्याग्दीका अध्यक्ष तथा सिद्धार्थ बैंकका शाखा प्रबन्धक नारायण सापकोटाले विद्यार्थीलाई वित्तीय व्यवस्थापन, बचतको बानी, सुरक्षित लगानी तथा भविष्यको आर्थिक सुरक्षाका विषयमा जानकारी गराउनुभएको थियो।
त्यस क्रममा बैंक खाता अपडेट गर्नुपर्ने, रकम गायब भएको, राष्ट्रिय परिचयपत्रको विवरण आवश्यक परेको लगायतका बहाना बनाएर ठगी गर्ने प्रवृत्तिबारे पनि विद्यार्थीलाई सचेत गराइएको थियो।
स्क्यामरहरूले मानिसको मनोविज्ञानलाई लक्षित गर्दै कहिले चिठ्ठा परेको, कहिले रोजगारीको अवसर प्राप्त भएको र कहिले बैंक खाता बन्द हुने भन्दै प्रलोभन तथा डर सिर्जना गरेर व्यक्तिगत र वित्तीय विवरण माग्ने गरेको कार्यक्रममा जानकारी दिइएको थियो।
कार्यक्रममा विद्यार्थीको सक्रिय सहभागिता रहेको थियो। विद्यार्थीहरू विभिन्न गतिविधिमा सहभागी हुनुका साथै आफूले सिकेका कुरा र डिजिटल कारोबार गर्दा अपनाउनुपर्ने सावधानीबारे आफ्ना धारणा समेत प्रस्तुत गरेका थिए।
वित्तीय साक्षरता पैसा बचत गर्ने वा लगानी गर्ने ज्ञानमा मात्र सीमित नभई आफ्नो पैसाको मूल्य बुझ्ने, आवश्यकता र प्रलोभन छुट्याउने, डिजिटल कारोबारअघि सोच्ने तथा व्यक्तिगत र वित्तीय विवरण सुरक्षित राख्ने क्षमता पनि भएको कार्यक्रममा जोड दिइएको थियो।
एउटा गलत लिंकमा क्लिक गर्दा व्यक्तिगत विवरण बाहिरिन सक्ने र अपरिचित व्यक्तिलाई विश्वास गर्दा वर्षौंको मेहनतबाट जम्मा गरेको रकम क्षणभरमै गुम्न सक्ने भएकाले डिजिटल कारोबारमा विशेष सावधानी अपनाउनुपर्नेमा जोड दिइएको छ।
कार्यक्रमले विद्यार्थीलाई आफू मात्र सचेत नभई परिवार, अभिभावक र समुदायका अन्य सदस्यलाई समेत डिजिटल ठगीबाट जोगिन आवश्यक जानकारी प्रवाह गर्न प्रेरित गरेको छ।
प्रविधिबाट टाढा भाग्ने होइन, त्यसलाई सुरक्षित र विवेकपूर्ण रूपमा प्रयोग गर्न सिक्नुपर्नेमा जोड दिँदै कार्यक्रम सम्पन्न गरिएको हो।
लोभ र प्रलोभनको डिजिटल जालबाट जोगिन वित्तीय ज्ञानसँगै डिजिटल सचेतना आवश्यक रहेको सन्देश कार्यक्रमले दिएको छ।
