पर्वत, भदौ-१५, नेपाल प्रेस युनियन पर्वतको सातौँ जिल्ला अधिवेशनले पत्रकार विष्णु गौतमको अध्यक्षतामा नयाँ कार्यसमिति चयन गरेको छ। आइतबार पर्वतको कुश्मामा सम्पन्न अधिवेशनबाट गौतम सर्वसम्मत रूपमा अध्यक्षमा चयन हुनुभएको हो।
गौतम लामो समयदेखि पर्वतको पत्रकारिता क्षेत्रमा सक्रिय रहँदै आउनुभएको छ। उहाँले वि.सं. २०६६ तिर रेडियो दिदीबहिनीबाट पत्रकारिता सुरु गर्नुभएको थियो। त्यसपछि केही वर्ष स्थानीय कालीगण्डकी टेलिभिजनमा समाचारवाचक तथा कार्यक्रम प्रस्तोताका रूपमा काम गर्नुभएको थियो।
अध्यक्षमा चयन भएपछि पत्रकार गौतमले नेपाली पत्रकारिताले विभिन्न चुनौती र समस्या सामना गरिरहेको भन्दै जनताको पीरमर्कालाई समाचारको मुख्य विषय बनाउनुपर्नेमा जोड दिनुभएको छ।
जनताको वास्तविक पीडा र कठिनाइलाई पत्रकारको कलमले उठाउन सके मात्रै पत्रकारिता क्षेत्रको अस्तित्व जोगाउन सकिने उहाँको भनाइ छ। सञ्चारिका समूह पर्वतको अध्यक्ष तथा प्रेस युनियन पर्वतको उपाध्यक्षसमेत रहिसक्नुभएकी गौतम हाल आफ्नै सञ्चालनमा रहेको धौलागिरि मिडिया अनलाइनमा कार्यरत हुनुहुन्छ।
गौतम प्रेस युनियन पर्वतको तीन वर्षे पूर्ण कार्यकालका लागि अध्यक्ष बन्ने पहिलो महिला पत्रकारसमेत बन्नुभएको छ। यसअघि पाँचौँ जिल्ला अधिवेशनबाट माया अधिकारी अध्यक्षमा चयन हुनुभएको थियो। तर, अध्यक्षका उम्मेदवार उत्तम अधिकारी र माया अधिकारीबीच बराबर मत आएपछि गोलाप्रथाबाट आलोपालो नेतृत्व गर्ने सहमति भएको थियो। त्यसअनुसार अधिकारीले करिब डेढ वर्ष मात्रै अध्यक्षको जिम्मेवारी सम्हाल्नुभएको थियो।
अधिवेशनले गौतमको नेतृत्वमा ११ सदस्यीय कार्यसमिति चयन गरेको छ। समितिको उपाध्यक्षमा योगराज गिरी बद्री र इन्दिरा शर्मा, सचिवमा मुनाकुमारी खत्री लामिछाने, कोषाध्यक्षमा पूजा शर्मा र सहसचिवमा मीना पराजुली चयन हुनुभएको छ।
त्यसैगरी सदस्यहरूमा बसन्त बास्तोला, अस्मिता गौतम, सुरेश रेग्मी, सन्तोष पराजुली र खिममाया पाइजा गिरी रहनुभएको छ।
