म्याग्दी, २५ साउन । म्याग्दीको खेलकुद क्षेत्रको विकास, प्रवर्द्धन र संरक्षणमा लामो समय योगदान पुर्याउनुभएका जिल्ला खेलकुद विकास समितिका कार्यालय प्रमुख दानबहादुर राईलाई बिदाइ तथा सम्मान गरिएको छ।
जिल्ला खेलकुद विकास समिति म्याग्दीले राईलाई सम्मानपत्र प्रदान गर्दै उहाँले कार्यालय प्रमुखका रूपमा पुर्याउनुभएको योगदानको उच्च प्रशंसा गरेको हो।
राईले वि.सं. २०५५ साल मंसिर २१ गतेदेखि २०८३ साल जेठ २८ गतेसम्म निरन्तर २८ वर्ष इमानदारी, निष्ठा, समर्पण र उत्कृष्ट कार्यसम्पादनका साथ कार्यालय प्रमुखको जिम्मेवारी निर्वाह गर्नुभएको सम्मानपत्रमा उल्लेख छ।
उहाँले जिल्लामा खेलकुद गतिविधिको सञ्चालन, खेलाडी तथा खेलकर्मीको प्रोत्साहन र खेलकुद पूर्वाधार विकासमा महत्वपूर्ण भूमिका निर्वाह गर्नुभएको थियो।
राईको योगदानको उच्च कदर गर्दै सम्मान गरिएको र उहाँको आगामी जीवन सुख, शान्ति, सुस्वास्थ्य, दीर्घायु तथा उज्ज्वल भविष्यको कामना गरिएको छ।
कार्यक्रममा जिल्ला खेलकुद विकास समितिका पूर्व अध्यक्ष तथा पूर्व सांसद विनोद केसी, पूर्व अध्यक्ष दिनेश केसी र वर्तमान अध्यक्ष सुमन श्रेष्ठले राईलाई सम्मान तथा बिदाइ गर्नुभएको थियो।
२८ वर्षसम्म म्याग्दीको खेलकुद क्षेत्रको प्रशासनिक नेतृत्वमा रहेर योगदान दिनुभएका राईको बिदाइसँगै उहाँको लामो सेवाको स्मरण गरिएको हो।
