बेनी, म्याग्दी, असार-२६, संगम म्याग्दीको आयोजना तथा बेनी नगरपालिकाको वडा नं. ५ (पुलाचौर) र वडा नं. ९ (घतान) मा सञ्चालन हुने बालविवाह न्यूनीकरण परियोजनासम्बन्धी समन्वय बैठक सम्पन्न भएको छ।
बैठकमा संगम म्याग्दीका कार्यकारी निर्देशक दीपक पौडेलले परियोजनाको उद्देश्य, कार्ययोजना तथा सञ्चालन गरिने विभिन्न गतिविधिबारे विस्तृत प्रस्तुतीकरण गर्नुभएको थियो। उहाँले बालविवाह न्यूनीकरणका लागि विद्यालय, समुदाय, अभिभावक र स्थानीय सरकारबीचको सहकार्यलाई थप प्रभावकारी बनाउने उद्देश्यले परियोजना सञ्चालन गर्न लागिएको जानकारी दिनुभयो। परियोजना संयोजक खिमा पुर्जाले हाल सम्म सम्पन्न भएका परियोजना र संचालन हुने परियोजनाको बजेटबारे प्रष्ट पार्नुभएको थियो ।
कार्यक्रममा बेनी नगरपालिकाका नगरप्रमुख सुरत केसी, उपप्रमुख ज्योति लामिछाने, प्रमुख प्रशासकीय अधिकृत, नौ वटै वडाका अध्यक्षहरू तथा अन्य सरोकारवालाहरूको सहभागिता रहेको थियो।
कार्यक्रममा बोल्दै नगरप्रमुख सुरत केसी र उपप्रमुख ज्योति लामिछानेले बालविवाह अझै पनि समाजमा चुनौतीका रूपमा रहेकाले यसको अन्त्यका लागि स्थानीय सरकार, विद्यालय, अभिभावक र समुदायबीच समन्वय आवश्यक रहेको बताउँदै परियोजनाको सफल कार्यान्वयनमा नगरपालिकाको पूर्ण सहयोग रहने प्रतिबद्धता व्यक्त गर्नुभयो।
वार्षिक रु. २२ लाख ६७ हजार ८८० बजेट रहेको उक्त परियोजनाअन्तर्गत पुलाचौर र घतान क्षेत्रका ९ वटा विद्यालयलाई लक्षित गरी विभिन्न कार्यक्रम सञ्चालन गरिनेछ।
परियोजनाअन्तर्गत बालविवाह न्यूनीकरणसम्बन्धी अभिमुखीकरण तथा किशोरकिशोरी समूह गठन, टोल विकास समिति गठन तथा क्षमता विकास तालिम, किशोरकिशोरीका लागि नेतृत्व विकास र उद्यमशीलता तालिम, डिजिटल सुरक्षा सचेतना कार्यक्रम, अभिभावक शिक्षा कार्यक्रम, विद्यालयमा खेलकुद सामग्री सहयोग, महिलाहरूको आर्थिक सशक्तीकरण, सुरक्षित प्रजनन स्वास्थ्य अधिकारसम्बन्धी अभिमुखीकरण, विद्यालयमा अतिरिक्त क्रियाकलाप सञ्चालन, पालिकास्तरीय चित्रलेखन प्रतियोगिता तथा १६ दिने अभियान, बाल दिवस र महिला दिवस लगायत विशेष दिवस मनाउने कार्यक्रमहरू सञ्चालन गरिने संगम म्याग्दीले जनाएको छ।
यसका साथै परियोजनाअन्तर्गत गुणस्तरीय शिक्षा योजना निर्माण, कार्यक्रमको नियमित अनुगमन तथा मूल्याङ्कन गरी बालविवाह न्यूनीकरण अभियानलाई समुदायस्तरसम्म प्रभावकारी रूपमा विस्तार गरिने लक्ष्य लिइएको छ। आयोजकका अनुसार परियोजनाले किशोरकिशोरी, अभिभावक, विद्यालय र समुदायमा सकारात्मक व्यवहार परिवर्तन ल्याई बालविवाह न्यूनीकरणमा महत्वपूर्ण योगदान पुर्याउने अपेक्षा गरिएको छ।
