देवी जिसी / पर्वत, असार-१२, पर्वतको जलजला गाउँपालिकामा सञ्चालित वृद्धिमुखी उद्यमशीलता तथा रोजगारी प्रवर्द्धन कार्यक्रम अन्तर्गत आयोजित लगानी प्रस्तुतीकरणमा टपरी एग्रो प्रालि सर्वोत्कृष्ट घोषित हुँदै एक लाख ५० हजार रुपैयाँ नगद पुरस्कार प्राप्त गरेको छ।
गण्डकी प्रदेश सरकारको उद्योग तथा पर्यटन मन्त्रालय, जलजला गाउँपालिका र दायित्व संस्थाको सहकार्यमा शुक्रबार गाउँपालिकाको सभाहलमा आयोजित उत्कृष्ट १० उद्यमीको व्यावसायिक प्रस्तुतीकरणमा जलजला–४, मोहनचोकस्थित टपरी एग्रो प्रालिकी व्यवस्थापक जमुना आचार्य उत्कृष्ट बन्न सफल हुनुभएको हो।
२०८१ सालमा स्थापना भएको टपरी एग्रो प्रालिले स्थानीय तथा हिमाली क्षेत्रका अर्गानिक उत्पादनसहित करिब एक सय प्रकारका सामग्रीको बजारीकरण गर्दै आएको छ। वार्षिक ८० लाख रुपैयाँभन्दा बढीको अर्गानिक उत्पादन बिक्री गर्दै आएको संस्थाले स्थानीय उद्यमीलाई आर्थिक रूपमा आत्मनिर्भर बनाउने उद्देश्यसहित आगामी दिनमा व्यवसाय थप विस्तार गर्ने योजना प्रस्तुत गरेको थियो।
कार्यक्रममा अभिषेक तरकारी तथा पशुपंक्षी फर्मकी सावित्री खत्री, जलजला कृषि तथा पशुपंक्षी फर्मकी शुभकुमारी कार्की, थापा लोकल मार्टकी कमला बानियाँ थापा, मल्ल ढाका उद्योगकी उषा मल्ल, गोमा गाईभैँसी फर्मका तोपबहादुर क्षेत्री, पाईजा अर्गानिक फलफूल तथा पशुपंक्षी फर्मकी बसन्ती पाईजा, पाईजा नर्सरी फर्मका नरबहादुर पाईजा, राधादेवी पशुपंक्षी तथा कृषि फर्मकी राधिका भुसाल तथा श्री हरि सुन्तला बगैँचा तथा पशुपंक्षी फर्मकी ताराकुमारी रेग्मीलाई जनही एक लाख रुपैयाँ नगद पुरस्कार प्रदान गरिएको थियो।
सर्वोत्कृष्ट तथा उत्कृष्ट उद्यमीलाई गाउँपालिका उपाध्यक्ष दिपक आचार्य, प्रमुख प्रशासकीय अधिकृत खगराज गौतम, गण्डकी प्रदेश उद्योग तथा पर्यटन मन्त्रालयका प्रशासकीय अधिकृत अशोककुमार नेपाली र दायित्व संस्थाका प्रदेश संयोजक विजय जिसीले सम्मान तथा पुरस्कार वितरण गर्नुभएको थियो।
कार्यक्रमका प्रमुख अतिथि उद्योग तथा पर्यटन मन्त्रालयका प्रसासकिय अधिकृत अशोक कुमार नेपालीले सफल उद्यमीहरूको उदाहरणले कृषि तथा पशुपालनतर्फ नयाँ पुस्तालाई आकर्षित गर्न सहयोग पुग्ने बताउँदै आगामी दिनमा पनि उद्यमशीलता प्रवर्द्धनका कार्यक्रमलाई अनुदानसहित निरन्तरता दिइने बताउनुभयो।
कार्यक्रमका अनुसार जलजलाका ९ वटै वडाबाट प्राप्त १५४ आवेदनमध्ये विभिन्न सूचकका आधारमा पहिलो चरणमा ४० जना उद्यमी छनोट गरी तालिम प्रदान गरिएको थियो। त्यसपछि २० जना हुँदै अन्तिम चरणमा उत्कृष्ट १० उद्यमी छनोट गरी सम्मान गरिएको हो।
कार्यक्रमका फिल्ड अफिसर विश्वनाथ आचार्यका अनुसार गत आर्थिक वर्षमा उत्कृष्ट २० मा परेका उद्यमीलाई विभिन्न चरणमा अनुदान तथा क्षमता विकासका कार्यक्रम सञ्चालन गरिँदै आएको छ। प्रदेश सरकारको ४० लाख, जलजला गाउँपालिकाको २० लाख रुपैयाँ तथा दायित्व संस्थाको प्राविधिक सहयोगमा सञ्चालित यस कार्यक्रमले स्थानीय उद्यमको प्रवर्द्धन, रोजगारी सिर्जना र नयाँ उद्यमी उत्पादनमा योगदान पुर्याउने अपेक्षा गरिएको छ। आगामी आर्थिक वर्षमा उद्यमीको सफलता र व्यवसायको दिगोपनामा केन्द्रित भएर कार्यक्रम सञ्चालन गरिने जनाइएको छ।
