म्याग्दी, असार -६, रघुगंगा गाउँपालिका–स्थित अमर माध्यमिक विद्यालय, पाखापानी र महेन्द्र मावि झींमा साइबर अपराध तथा सामाजिक सञ्जालको सुरक्षित प्रयोग सम्बन्धी एक दिने प्रशिक्षण कार्यक्रम सम्पन्न भएको छ।
एकीकृत सेवा कार्यालयको आयोजनामा तथा संगम म्याग्दी र जिल्ला प्रहरी कार्यालय म्याग्दीको समन्वयमा असार ४ र ५ गते आयोजित कार्यक्रममा विद्यालयका कक्षा ९ र १० मा अध्ययनरत विद्यार्थीहरू सहभागी भएका थिए।
कार्यक्रममा प्रशिक्षक कृष्ण बहादुर जिसीले साइबर अपराधको परिचय दिँदै फिसिङ, पहिचान चोरी, साइबरबुलिङ, अनलाइन ब्ल्याकमेलिङ, सेक्सटोर्शन, अनलाइन ठगी, ह्याकिङ, म्यालवेयर तथा भाइरस, र्यान्सम्वेयर, डेटा चोरी र डीडीओएस आक्रमण लगायतका साइबर अपराधका प्रमुख प्रकारबारे जानकारी गराउनुभएको थियो।
त्यसैगरी सामाजिक सञ्जालमार्फत हुने फेक न्यूज प्रसार, अश्लील सामग्री वितरण, नक्कली खाता सञ्चालन, अनलाइन जुवा तथा साइबर आतंकवाद जस्ता सामाजिक साइबर अपराधका विषयमा समेत सहभागी विद्यार्थीलाई सचेत गराइएको थियो।
प्रशिक्षणका क्रममा नेपालमा साइबर अपराध सम्बन्धी कानुनी व्यवस्था, व्यक्तिगत गोपनीयता ऐन २०७५, तथा साइबर अपराधको उजुरी दिन सकिने नेपाल प्रहरीको साइबर ब्युरो र जिल्ला प्रहरी कार्यालयलगायतका निकायबारे जानकारी प्रदान गरिएको थियो।
प्रशिक्षक जिसीले सामाजिक सञ्जालको सुरक्षित प्रयोगका उपायबारे प्रयोगात्मक अभ्याससमेत गराउँदै विद्यार्थीहरूलाई डिजिटल सुरक्षाका आधारभूत सीप सिकाउनुभएको थियो।
कार्यक्रममा संगम म्याग्दीका कार्यकारी निर्देशक दीपक पौडेल, उपाध्यक्ष देवी सुबेदी जिसी, कोषाध्यक्ष जानुका अधिकारी, वित्त अधिकृत सुमित्रा क्षेत्री तथा परियोजना निर्देशक खिमा पुर्जालगायतको उपस्थिति रहेको थियो।
