देवी सुबेदी जिसी /जेठ-१४, म्याग्दी,
लायन्स क्लव इन्टरनेशल अन्तर्गतको लायन्स क्लब अफ म्याग्दी दोभानले “पढाऔँ अभियान” कार्यक्रममार्फत स्वर्गीय नैन कुमार श्रेष्ठको नवौँ स्मृतिमा छात्रवृत्ति तथा शैक्षिक सामग्री वितरण गरेको छ।
बुधबार बेनी सामुदायिक माध्यमिक विद्यालयमा आयोजित कार्यक्रममा स्वर्गीय नैन कुमार श्रेष्ठकी छोरी लायन अम्बिका श्रेष्ठले १४ जना विद्यार्थीलाई स्टेशनरी सामग्री तथा दुई जना विद्यार्थीलाई जनही सात हजार रुपैयाँका दरले नगद छात्रवृत्ति वितरण गर्नुभएको हो।
विद्यालयका कक्षा १ देखि ५ सम्म अध्ययनरत जेहेन्दार, गरिब तथा पिछडिएका विद्यार्थीलाई लक्षित गरी शैक्षिक सामग्री प्रदान गरिएको क्लबले जनाएको छ।
कार्यक्रममा लायन्सका पूर्वअध्यक्ष भीमकुमारी सुवेदी तथा सञ्चारिका समूहकी अध्यक्ष देवी सुवेदी जिसीले शुभकामना मन्तव्य व्यक्त गर्नुभएको थियो। त्यसैगरी पूर्वअध्यक्ष अम्बिका श्रेष्ठले विद्यार्थीलाई सहयोग गर्न पाउँदा आफूलाई गर्व लागेको बताउनुभयो।
लायन्स क्लब अफ म्याग्दी दोभानका अध्यक्ष खुमा खड्काको अध्यक्षतामा सम्पन्न कार्यक्रममा बेनी सामुदायिक माविका सहायक प्रधानाध्यापक शिवादत्त रेग्मी प्रमुख अतिथि रहनुभएको थियो। कार्यक्रमको स्वागत सञ्जु बरुवालले तथा सञ्चालन पुष्पा थापाले गर्नुभएको थियो।
