म्याग्दी, २० वैशाख , विश्व प्रेस स्वतन्त्रता दिवसको अवसरमा नेपाल पत्रकार महासंघ म्याग्दी शाखाले सामाजिक उत्तरदायित्व अन्तर्गत बालगृहका बालबालिकालाई लक्षित गरी स्वास्थ्य सेवा तथा सहयोग कार्यक्रम सम्पन्न गरेको छ।
नेपाल बाल संगठनद्वारा सञ्चालित म्याग्दी बालगृहमा आयोजित कार्यक्रममा आश्रित ८ जना बालबालिकाको दाँत, आँखा, कान लगायतको स्वास्थ्य परीक्षण गरिएको थियो। साथै आवश्यक औषधि तथा केही खाद्यान्न सामग्री समेत वितरण गरिएको महासंघले जनाएको छ।
कार्यक्रमका प्रमुख अतिथि महासंघ गण्डकी प्रदेशका उपाध्यक्ष प्रकाश पौडेलले प्रेस स्वतन्त्रता लोकतन्त्रको मेरुदण्ड भएको उल्लेख गर्दै पत्रकारहरू अझै पनि दबाब, धम्की र असुरक्षाको सामना गरिरहेको बताउनुभयो। उहाँले पत्रकारहरूको सुरक्षा सुनिश्चित गर्नु राज्यको पहिलो दायित्व भएको धारणा राख्नुभयो।
उहाँका अनुसार, पत्रकारहरूलाई सुरक्षित र मर्यादित वातावरणमा काम गर्ने सुनिश्चितता नभएसम्म प्रेस स्वतन्त्रता पूर्ण रूपमा कार्यान्वयन भएको मान्न सकिँदैन। साथै उहाँले पत्रकारिता समाचार सम्प्रेषणमा मात्र सीमित नभई समाजप्रतिको जिम्मेवारीसँग पनि जोडिएको बताउनुभयो।
कार्यक्रममा महासंघ म्याग्दीका संस्थापक अध्यक्ष घनश्याम खड्का तथा प्रेस सेन्टर गण्डकी प्रदेशका महासचिव सन्तोष गौतमले पनि मन्तव्य व्यक्त गर्दै स्वतन्त्र प्रेसको संरक्षण आवश्यक रहेकोमा जोड दिनुभयो।
नेपाल पत्रकार महासंघ म्याग्दी शाखाका अध्यक्ष हरिकृष्ण गौतमले बालबालिकाको स्वास्थ्य संरक्षणमा सहयोग पुर्याउने उद्देश्यले कार्यक्रम आयोजना गरिएको जानकारी दिनुभयो। उहाँले आगामी दिनमा पनि यस्ता सामाजिक कार्यलाई निरन्तरता दिने बताउनुभयो।
कार्यक्रममा नेपाल नेत्र ज्योति संघ म्याग्दीका नेत्र अधिकृत दिनेश बानियाँ, कोर–स्माईल डेन्टल क्लिनिकका डा. मोचन श्रेष्ठ तथा बेनी सञ्जिवनी क्लिनिकका हेल्थ असिस्टेन्ट लोकराज जोशीले स्वास्थ्य परीक्षण गर्नुभएको थियो।
कार्यक्रम महासंघ म्याग्दीका अध्यक्ष हरिकृष्ण गौतमको अध्यक्षता, उपाध्यक्ष अमित विश्वकर्माको स्वागत मन्तव्य र सहसचिव सन्दिप शर्मा रिजालको सञ्चालनमा सम्पन्न भएको थियो।
