जलजला, बैशाख-२, पर्वत जिल्लाको जलजला गाउँपालिका–५ कुवापानीस्थित गिद्देश्वर आधारभूत विद्यालयलाई खेल सामग्री सहयोग गरिएको छ। राष्ट्रिय भलिबल रेफ्री अमर बहादुर पुनले विद्यालयलाई भलिबल, नेट र पम्प हस्तान्तरण गर्नुभएको हो। नयाँ वर्षको अवसरमा आयोजित नवनिर्मित विद्यालय भवन तथा प्रवेशद्वारको समुद्घाटन कार्यक्रममा उहाँले उक्त सामग्री प्रदान गर्नुभएको हो।
आफूले अध्ययन गरेको विद्यालयप्रति सहयोग गर्ने उद्देश्यले सामग्री हस्तान्तरण गरिएको बताइएको छ। सहयोग हस्तान्तरणपछि फुमले आफूले पढेको विद्यालयमा योगदान गर्न पाउँदा खुसी लागेको प्रतिक्रिया दिनुभएको छ। कार्यक्रममा पुनलाई विद्यालयले सम्मान समेत गरेको छ ।
गिद्देश्वर आधारभूत विद्यालयका पूर्व विद्यार्थीहरू विभिन्न क्षेत्रमा सफल बन्दै आएका छन्। यस विद्यालयमा अध्ययन गरेका विद्यार्थीहरु प्राध्यापक, चिकित्सक, खेलाडी तथा कला क्षेत्रमा विशिष्टता हासिल गरिसकेका छन् ।
