बेनी, बैशाख-२, म्याग्दीमा अब राहदानी लिन नागरिकले कार्यालय धाउनुपर्ने झन्झट हट्ने भएको छ। म्याग्दी जिल्लामा घरदैलोमै राहदानी वितरण सेवा सुरु गरिएको छ। बेनी नगरपालिका–२ ज्यामरुककोटस्थित बिमिराबोटकी सरस्वती थापा घिमिरेले पहिलोपटक घरमै राहदानी प्राप्त गर्नुभएको छ। बुधबार प्रमुख जिल्ला अधिकारी रबिन्द्र आचार्य स्वयं घरमै पुगेर उहाँलाई छोराछोरीसहित चार वटा राहदानी हस्तान्तरण गर्नुभएको हो।
सरकारले सेवा प्रवाहलाई सहज र प्रभावकारी बनाउने उद्देश्यसहित हुलाकमार्फत राहदानी र सवारी चालक अनुमतिपत्र घरमै पुर्याउने नीति ल्याएपछि म्याग्दीमा यसको कार्यान्वयन सुरु भएको हो। प्रधानमन्त्री बालेन्द्र शाह नेतृत्वको सरकारले स्वीकृत गरेको शासकीय सुधार कार्यसूचीअनुसार यो सेवा अघि बढाइएको हो।
ज्यामरुककोटबाट औपचारिक रूपमा सेवा सुरु गरिएको कार्यक्रममा वडा अध्यक्ष यामबहादुर कार्कीले जनताको घरदैलोमै सेवा पुर्याउने अभियानमा जनप्रतिनिधि तथा जनशक्तिलाई सक्रिय बनाइने बताउनुभयो।
जिल्ला हुलाक कार्यालय म्याग्दीका प्रमुख रमेश थापाका अनुसार बुधबार मात्रै ज्यामरुककोट, खवरा र वडा नम्बर ६ चुत्रेनी क्षेत्रमा सात वटा राहदानी वितरण गरिएको छ। उहाँले अब सबै पालिकामा हुलाकमार्फत चिठीजस्तै राहदानी घरदैलोमै पुर्याइने जानकारी दिनुभयो।
प्रमुख जिल्ला अधिकारी आचार्यका अनुसार यो सेवा निःशुल्क रहेको छ र आगामी दिनमा अन्य सेवासमेत घरमै उपलब्ध गराउने योजना बनाइएको छ। जिल्ला प्रशासन कार्यालयले राहदानी तयार हुनासाथ हुलाकमार्फत वितरण गर्ने प्रक्रिया समेत सुरु गरिसकेको जनाएको छ।
यससँगै हुलाक सेवालाई ‘सरकारी कुरियर’का रूपमा विकास गर्ने तयारी पनि अघि बढाइएको छ।
