बेनी चैत-२५, म्याग्दीको बेनी नगरपालिका-९, जलेश्वरमा आज साँझ बस र ट्रक एकापसमा ठोकिँदा १५ जना भारतीय पर्यटक घाइते भएका छन्। मुस्ताङबाट पोखरातर्फ आउँदै गरेको ग २ ख १४५७ नम्बरको बस र भैरहवाबाट म्याग्दीको रुप्सेतर्फ जाँदै गरेको ग.प्र. ०१-००१ ख ००१२ नम्बरको ट्रक आज साँझ करिब साढे ६ बजे जलेश्वरमा ठोकिएका हुन्।
दुर्घटनाको खबर प्राप्त हुनासाथ जिल्ला प्रहरी कार्यालय म्याग्दीका प्रहरी निरीक्षक सागर तिमिल्सिनाको नेतृत्वमा खटिएको टोलीले घाइतेहरूको उद्धार गरेको थियो। घाइते सबै भारतीय नागरिक हुन्। उनीहरूको हाल प्रदेश अस्पताल, बेनीमा उपचार भइरहेको छ।
प्रहरीका अनुसार घाइते हुनेहरूमा भारतको उत्तर प्रदेशका ६२ वर्षीय दीपकराज मित्तल, ५३ वर्षीया अल्का गुप्ता, मध्य प्रदेशका ४२ वर्षीया कृति शर्मा, ३८ वर्षीय गौरव सेनी, ३७ वर्षीया रिचा कौशिक र ३९ वर्षीय गौरव कौशिक रहेका छन्।
त्यसैगरी गुजरातका ७२ वर्षीय राज अडोलिया, २० वर्षीया सिम्रण साहाय, ४८ वर्षीय विनित गोयल र ४२ वर्षीया निरु चौधरी पनि घाइते भएका छन्। अन्य घाइतेहरूमा हरियाणाकी ६७ वर्षीया प्रेमा शर्मा, जयपुर राजस्थानका ५८ वर्षीय अरविन्द भट्ट, दिल्लीका ६९ वर्षीय रामगोपाल शर्मा र ४८ वर्षीया बन्धना शर्मा रहनुभएको छ। घाइतेमध्ये बन्धना शर्माको अवस्था मध्यम रहेको र अन्य सबैको अवस्था सामान्य रहेको प्रहरीले जनाएको छ।
सवारी र चालकको अवस्था: बसमा चालक र सह-चालक सहित २४ जना सवार थिए, जसमध्ये ९ जना सकुशल रहेका छन्। दुर्घटनामा बसको अगाडिको भाग पूर्ण रूपमा क्षति भएको छ भने ट्रकको अगाडिको भागमा पनि क्षति पुगेको छ।
प्रहरीका अनुसार बस चालक कास्कीका ३१ वर्षीय विकास जि.सी. र ट्रक चालक पर्वतका २८ वर्षीय नारायण प्रसाद शर्मा दुवैले मादक पदार्थ सेवन नगरेको पुष्टि भएको छ। ट्रक चालक हाल प्रहरीको सम्पर्कमा छन् भने बस चालक उपचारमा संलग्न रहेका छन्। दुवै सवारी साधन अहिले घटनास्थलमै रहेका छन्।
