बेनी, चैत-१५, म्याग्दीको मंगला गाउँपालिका–५ स्थित चाँगा धुरीलाई पर्यटकीय गन्तव्यका रूपमा विकास गर्ने उद्देश्यले शनिबार पर्यटन प्रवर्द्धन अभियान सञ्चालन गरिएको छ। प्राकृतिक सौन्दर्यले भरिपूर्ण उक्त क्षेत्रमा म्याग्दी जेसीजले प्रवर्द्धनात्मक कार्यक्रम आयोजना गरेको हो।
कार्यक्रमका क्रममा चाँगा धुरी पुगेका जेसीजका पदाधिकारी तथा स्थानीय बासिन्दाको सहभागितामा पर्यटक लक्षित सूचना बोर्ड स्थापना गर्नुका साथै पर्यटनसम्बन्धी छलफल गरिएको थियो। पर्यटकलाई स्थानको परिचय, विशेषता तथा अवलोकन बिन्दुहरूको जानकारी दिन सूचना बोर्ड राखिएको म्याग्दी जेसीजका महासचिव गोकुल बिकले जानकारी दिनुभयो।
“ओझेलमा परेको गन्तव्यको प्रचारप्रसार गर्दै पर्यटन प्रवर्द्धन गर्ने उद्देश्यले सूचना बोर्ड स्थापना गरेका हौं,” उहाँले भन्नुभयो, “यसले पर्यटकीय स्थलको विकासमा टेवा पुग्ने विश्वास गरेका छौं।” समुद्री सतहदेखि करिब २,२०० मिटर उचाइमा अवस्थित चाँगा धुरीमा हालै सडक, खानेपानी तथा केन्द्रीय विद्युत् विस्तार भएपछि भ्रमण सहज बनेको छ।
Screenshot
स्थानीय तह तथा विभिन्न संस्थाहरूको सक्रियतासँगै आन्तरिक पर्यटकको आगमन पनि बढ्न थालेको छ। पूर्वाधार अभावका कारण ओझेलमा परेको यस क्षेत्रबाट पुथा, गुर्जा, सिता, चुरेन, मानापाथी, धवलागिरि, नीलगिरि, अन्नपूर्ण, माछापुच्छ्रे, गणेश र धम्पुस लगायत एक दर्जनभन्दा बढी हिमालका साथै सूर्योदय र सूर्यास्तको मनमोहक दृश्य अवलोकन गर्न सकिन्छ।
सिर्कुम गाउँको शिरमा पर्ने यस क्षेत्रमा मंगला गाउँपालिकाको केन्द्रदेखि नै सडक सुविधा उपलब्ध रहेको छ। वडा नम्बर–५ का अध्यक्ष भुपेन्द्र बहादुर खत्रीले सडक स्तरोन्नति तथा होमस्टे (घरवास) सञ्चालन गर्न सके चाँगा धुरीलाई आकर्षणको केन्द्र बनाउन सकिने बताउनुभयो।
गाउँपालिका अध्यक्ष सात प्रसाद रोकाका अनुसार बेनीदेखि गौस्वारा, बेलढुंगा, चिनाकोट दरबार, झाँक्रीपानी, तिन्चुले, चाँगा , निस्कोट हुँदै रुमको दुरुलेकसम्मका स्थल समेटेर ग्रामीण पदमार्ग विकास गर्ने योजना अघि सारिएको छ।
