म्याग्दी, चैत-११, प्रदेश जनस्वास्थ्य कार्यालय म्याग्दीको आयोजनामा विश्व क्षयरोग दिवसको अवसरमा मङ्गलवार पत्रकारसँग अन्तर्क्रिया कार्यक्रम सम्पन्न भएको छ। “हो ! हामी क्षयरोग अन्त्य गर्छौँ : राष्ट्रिय अभियान, हाम्रो योगदान” भन्ने नारासहित कार्यक्रम आयोजना गरिएको हो।
कार्यक्रममा कार्यालय प्रमुख भूवन ठकुराठीले क्षयरोग एक सरुवा रोग भएको बताउँदै हावाको माध्यमबाट सर्ने जानकारी दिनुभयो। उहाँका अनुसार खोक्दा, हाछ्युँ गर्दा वा बोल्दा निस्कने किटाणुहरू श्वासप्रश्वासमार्फत फोक्सोमा पुगेर संक्रमण फैलाउने गर्छन्।
म्याग्दीमा एकलाख जनसंख्यामा २ सय ४५ संक्रमित पहिचान हुनुपर्ने भए पनि हाल वार्षिक रूपमा ६० देखि ६५ जनामात्रै पत्ता लाग्ने गरेको उहाँले बताउनुभयो। चालु आर्थिक वर्षको फागुन मसान्तसम्म जिल्लामा ३१ जना संक्रमित भेटिएका छन्, जसमा सबैभन्दा धेरै बेनी नगरपालिकामा १३ जना रहेका छन्।
स्वास्थ्य कार्यालयका अनुसार सचेतनाको अभाव र स्क्रिनिङ कार्यक्रम कम हुँदा अपेक्षित संख्यामा बिरामी पहिचान हुन नसकेको हो। एक जना संक्रमितले १५ देखि २० जनासम्म रोग सार्न सक्ने तथ्य पनि कार्यक्रममा प्रस्तुत गरिएको थियो।
कार्यक्रममा नेपाल पत्रकार महासंघ म्याग्दीका अध्यक्ष हरिकृष्ण गौतमले सञ्चार माध्यममार्फत जनचेतना फैलाउने प्रतिबद्धता जनाउनुभयो।
यसैबीच, राष्ट्रिय क्षयरोग केन्द्रका अनुसार नेपालमा वार्षिक करिब ६७ हजार नयाँ बिरामी फेला पर्ने गरेका छन्। तीमध्ये ७२ प्रतिशतमा फोक्सो सम्बन्धी र २८ प्रतिशतमा अन्य अङ्गमा संक्रमण देखिने गरेको छ।
क्षयरोगका लक्षणमा लामो समयसम्म खोकी लाग्ने, ज्वरो आउने, तौल घट्ने तथा खोकीमा रगत देखिने लगायत रहेका छन्। विज्ञहरूले धूम्रपान नगर्न, धुलो–धुवाँबाट जोगिन, खोक्दा मुख छोप्न र समयमै खोप लगाउन सुझाव दिएका छन्।
सरकारले देशभर ६ हजारभन्दा बढी स्वास्थ्य संस्थाबाट निःशुल्क उपचार सेवा उपलब्ध गराउँदै आएको छ। यद्यपि अझै ४२ प्रतिशत बिरामी उपचारको पहुँचमा आउन नसकेको जनाइएको छ।
नेपालले सन् २०३५ सम्म क्षयरोग महामारी अन्त्य गर्ने र २०५० सम्म देशलाई क्षयरोगमुक्त बनाउने लक्ष्य लिएको छ।
