बेनी, चैत -१०, म्याग्दीको बेनी नगरपालिका–२, हाडेभिरमा आज बिहान एक बोलेरो जिपमा आगजनी भएको छ।
बिहान करिब ५ बजेर ३० मिनेट जाँदा पार्किङ गरेर राखिएको ग २ च १०५४ नम्बरको बोलेरोमा अज्ञात समूहले आगजनी गरेको हो। उक्त गाडी युवा व्यवसायी सुमन श्रेष्ठको रहेको प्रहरीले जनाएको छ।
आगलागीबाट गाडीको भित्री भाग र टायर पूर्ण रूपमा जलेर क्षति पुगेको स्थानीयवासीले बताएका छन्। बिहानै गाडी बलिरहेको देखेपछि स्थानीयवासी र प्रहरीको सक्रियतामा आगो नियन्त्रणमा लिइएको थियो।
घटनाको जानकारी पाएलगत्तै जिल्ला प्रहरी कार्यालय म्याग्दीबाट प्रहरी टोली घटनास्थल पुगेर अनुसन्धान सुरु गरिसकेको छ। आगजनी कसले र किन गराएको हो भन्नेबारे भने अहिलेसम्म खुल्न सकेको छैन।
जिल्ला प्रहरी कार्यालय म्याग्दीका सूचना अधिकारी सागर तिमिल्सिनाका अनुसार घटनाको प्रकृति हेर्दा नियोजित रूपमा आगजनी गरिएको आशंका गरिएको छ। घटनामा संलग्न व्यक्तिको खोजी भइरहेको र सीसीटीभी फुटेजसहित अन्य प्राविधिक पक्षबाट अनुसन्धान अगाडि बढाइएको प्रहरीले जनाएको छ।
पछिल्लो समय बेनी बजार आसपासका क्षेत्रमा सवारी साधनमाथि हुने यस्ता घटनाले स्थानीयवासी र व्यवसायीहरूमा चिन्ता बढाएको छ।
