बेनी, चैत-९, म्याग्दीको बेनी नगरपालिका वडा नं. ३ भकिम्लीमा सार्वजनिक सुनुवाइ कार्यक्रम सम्पन्न भएको छ। आइतबार वडा कार्यालयमा आयोजित कार्यक्रममा आर्थिक वर्ष २०८२/८३ को दोस्रो चौमासिक अवधिसम्म सम्पन्न भएका विकास निर्माण तथा सेवा प्रवाहसम्बन्धी गतिविधिहरूको समीक्षा गरिएको हो।
कार्यक्रममा बेनी नगरपालिकाका प्रमुख प्रशासकीय अधिकृत अर्जुन शर्माले दोस्रो चौमासिकसम्मको कार्यप्रगति विवरण प्रस्तुत गर्नुभएको थियो । उहाँले चालु योजनाहरू, ठेक्का सम्झौता भैसकेर पनि कार्यान्वयन हुन बाँकी रहेका योजना तथा ठेक्का प्रक्रियामा जान लागेका योजनाहरूको अवस्थाबारे जानकारी गराउनुभयो । दोस्रो चौमासिकसम्म बेनी नगरपालिकाले कुल बजेटको ३७ दशमलव ५६ प्रतिशत खर्च गरेको छ । चालु आवमा कुल ७३ करोड नौलाख ६२ हजार रुपैयाँ बजेट ल्याएकोमा २७ करोड ४५ लाख ९० हजार रुपैयाँ खर्च भैसकेको छ ।
यसैगरी चालुतर्फ ५३ करोड ८२ लाख ६० हजार बजेट रहेकोमा २४ करोड ३८ लाख ९३ हजार अर्थात् ४५ दशमलव ३१ प्रतिशत बजेट खर्च भएको छ । त्यस्तै १९ करोड २७ लाख दुईहजार रुपैयाँ पूँजीगत बजेट विनियोजन भएकोमा हालसम्म तीन करोड छ लाख ९६ हजार रुपैयाँ अर्थात् १५ दशमलव ९३ प्रतिशत बजेट मात्रै खर्च भएको बेनी नगरपालिकाका प्रमुख प्रशासकीय अधिकृत शर्माले जानकारी दिनुभयो ।
सार्वजनिक सुनुवाइ कार्यक्रममा सहभागी स्थानीयवासीहरूले कृषि, सडक पूर्वाधार, उत्पादनको बजार व्यवस्थापन, स्वास्थ्य तथा शिक्षासम्बन्धी विभिन्न समस्या र जिज्ञासा राखेका थिए। सहभागीले उठाएका प्रश्नहरूको प्रमुख प्रशासकीय अधिकृत अर्जुन शर्मा, नगर प्रमुख सुरत केसी र उपप्रमुख ज्योति लामिछानेले जवाफ दिनुभएको थियो।
कार्यक्रमको सहजीकरण नेपाल पत्रकार महासंघ म्याग्दीका कृष्ण जिसी, प्रकाश पौडेल र बादल शाहीले गर्नुभएको थियो। कार्यक्रममा बेनी नगरपालिका वडा नं. १ देखि १० सम्मका नागरिकका प्रश्न, जिज्ञासा र सुझावहरू भिडियोमार्फत प्रस्तुत गरी छलफल गरिएको थियो।
कार्यक्रममा नगरपालिकाका सबै वडाका वडा अध्यक्ष, कार्यपालिका सदस्य तथा सरोकारवालाहरूको उपस्थिति रहेको थियो। नगर प्रमुख सुरत केसीको अध्यक्षता, वडा नं. ३ का अध्यक्ष पदम पुनको स्वागत मन्तव्य तथा प्रशासकीय अधिकृत युवराज थापाको सञ्चालनमा कार्यक्रम सम्पन्न भएको हो।
तस्विर : कृष्ण जिसी
