बेनी, चैत-५, म्याग्दी जिल्लाको बेनी नगरपालिका क्षेत्रमा सञ्चालन गरिएको नसर्ने रोगको स्क्रिनिङ शिविरबाट चार हजारभन्दा बढी सर्वसाधारण लाभान्वित भएका छन्।
गएको माघ महिनामा सञ्चालन गरिएको नसर्ने रोग सम्बन्धी स्क्रिनिङ कार्यक्रमबाट बेनी नगरपालिकाका कुल ४ हजार १ सय ५८ जनाले सेवा लिएको नगरपालिकाले जनाएको छ।
बेनी नगरपालिकाका १० वटा वडाका ५६ वटा समुदायमा सञ्चालन गरिएको उक्त शिविरमा मुख्यतः मधुमेह, उच्च रक्तचाप, मृगौला सम्बन्धी समस्या तथा शरीरको तौल र उचाइको अनुपात अर्थात् बीएमआई मापन गरिएको थियो।
शिविरमा ग्लुकोमिटरको माध्यमबाट रगतमा चिनीको मात्रा परीक्षण गरी मधुमेह भए नभएको पहिचान गरिएको थियो भने रक्तचाप मापन गरी आवश्यक परामर्श तथा प्रेषण सेवा प्रदान गरिएको जनाइएको छ। साथै, मृगौला रोग पत्ता लगाउन युरिन डिपस्टिक प्रयोग गरी पिसाबमा प्रोटिनको स्तर जाँच गरिएको जनस्वास्थ्य अधिकृत बालकुमारी पुनले जानकारी दिनुभयो।
उहाँका अनुसार बीएमआई असामान्य देखिएका व्यक्तिहरूलाई स्वस्थ जीवनशैली अपनाउन परामर्श सेवा समेत उपलब्ध गराइएको थियो।
सेवा लिनेहरूमा पुरुषको तुलनामा महिलाको सहभागिता बढी देखिएको छ। कुल परीक्षणमध्ये २ हजार ८ सय १५ महिला र १ हजार ३ सय ४३ पुरुष रहेका स्वास्थ्य शाखा प्रमुख चन्दन सुवेदीले बताउनुभयो।
वडागत रूपमा हेर्दा वडा नम्बर ९ मा सबैभन्दा बढी ६ सय ४० जनाले सेवा लिएका छन् भने अन्य वडाहरूमा पनि उल्लेखनीय सहभागिता रहेको जनाइएको छ।
शिविरबाट प्राप्त तथ्यांक अनुसार २६ प्रतिशतमा उच्च रक्तचाप, २५ प्रतिशतमा मधुमेह, ८ प्रतिशतमा मृगौला रोग र ७ प्रतिशतमा मोटोपनाको समस्या देखिएको छ। सेवा लिन आएका सबैलाई परामर्श प्रदान गरिएकोमा ३ सय ५७ जनालाई थप उपचारका लागि रिफर गरिएको छ।
नेपाल सरकारले आर्थिक वर्ष २०८१/०८२ देखि हरेक वर्ष फागुन महिनामा देशव्यापी रूपमा यस्तो स्क्रिनिङ अभियान सञ्चालन गर्ने योजना बनाएको भए पनि यस वर्ष प्रतिनिधि सभा निर्वाचनका कारण बेनी नगरपालिकाले माघ महिनामै कार्यक्रम सञ्चालन गरेको जनाएको छ।
बेनी नगरपालिकाले माघ १४ गतेदेखि फागुन १ गतेसम्म उक्त कार्यक्रम सञ्चालन गरेको हो। नसर्ने रोगको समयमै पहिचान गरी प्रारम्भिक चरणमै उपचार गर्ने उद्देश्यले कार्यक्रम सञ्चालन गरिएको नगरपालिकाले जनाएको छ।
यसैबीच, बेनी नगरपालिकाले आर्थिक वर्ष २०७९/८० देखि प्रत्येक महिनाको १५ गते सबै वडामा रहेका स्वास्थ्य संस्थामार्फत नसर्ने रोगको स्क्रिनिङ सेवा प्रदान गर्दै आएको छ।
नगर प्रमुख सुरत केसीका अनुसार ज्येष्ठ नागरिक, दीर्घरोगी तथा शारीरिक रूपमा अशक्त व्यक्तिहरूका लागि घरमै पुगेर स्वास्थ्य परीक्षण, परामर्श तथा औषधि सेवा पनि उपलब्ध गराइँदै आएको छ।
नगरपालिकाले शिक्षा र स्वास्थ्य क्षेत्रलाई उच्च प्राथमिकतामा राख्दै यस्ता कार्यक्रमलाई निरन्तरता दिँदै आएको जनाएको छ।
