बेनी, चैत-२,
वन डढेलो नियन्त्रण तथा व्यवस्थापनबारे जनचेतना अभिवृद्धि गर्ने उद्देश्यले डिभिजन वन कार्यालय म्याग्दीले पत्रकारहरूसँग अन्तरक्रिया कार्यक्रम आयोजना गरेको छ ।
“वन डढेलो व्यवस्थापन सप्ताह–२०८२” को अवसरमा आयोजित कार्यक्रममा वन डढेलो नियन्त्रणका लागि तीन तहका सरकार, सुरक्षा निकाय तथा स्थानीय समुदायबीच सहकार्य आवश्यक रहेकोमा जोड दिइएको छ ।
डिभिजन वन कार्यालय म्याग्दीका प्रमुख बसन्त केशव अधिकारीले सुक्खा मौसम, मानवीय लापरबाही तथा जलवायु परिवर्तनका कारण पछिल्ला वर्षहरूमा वन डढेलोका घटना बढ्दै गएको बताउनुभयो । उहाँले वन क्षेत्रमा झाडी जलाउने, घाँस–दाउरा संकलन गर्ने क्रममा हुने असावधानी तथा चुरोटको प्रयोगजस्ता कारणले डढेलो लाग्ने गरेको उल्लेख गर्नुभयो ।
नेपाल पत्रकार महासंघ म्याग्दीका अध्यक्ष हरीकृष्ण गौतमले वन डढेलो नियन्त्रणका लागि जनचेतना अभिवृद्धि अत्यन्त आवश्यक रहेको बताउँदै सञ्चारमाध्यममार्फत सचेतना फैलाउनुपर्ने धारणा व्यक्त गर्नुभयो ।
डिभिजन वन कार्यालयका अनुसार जिल्लाका ६ वटै स्थानीय तहमा सामुदायिक वनमार्फत सचेतनामूलक कार्यक्रम सञ्चालन, फायरलाइन निर्माण तथा डढेलो नियन्त्रणसम्बन्धी अभ्यास कार्यक्रम सञ्चालन गरिनेछ ।
तथ्यांकअनुसार म्याग्दीमा करिब ६५ प्रतिशत डढेलो चैत र वैशाख महिनामा लाग्ने गरेको छ । डढेलो जोखिमका दृष्टिले म्याग्दी देशका ७७ जिल्लामध्ये ३०औँ स्थानमा रहेको जनाइएको छ ।
