बेनी, चैत-१, म्याग्दीमा वन डढेलो नियन्त्रणका लागि सचेतना अभियान सुरु गरिएको छ। डिभिजन वन कार्यालय म्याग्दीले चैत्र १ गतेदेखि ७ गतेसम्म सञ्चालन हुने ‘वन डढेलो सचेतना सप्ताह’ सुरु गरेको हो।
वन क्षेत्रमा बढ्दो डढेलो जोखिम न्यूनीकरण गर्ने उद्देश्यले आयोजना गरिएको यस अभियानअन्तर्गत डढेलोको दृष्टिले संवेदनशील समुदायहरूमा विभिन्न सचेतनामूलक कार्यक्रम सञ्चालन गरिने जनाइएको छ।
जिल्ला समन्वय समितिकी कार्यबाहक प्रमुख दिलकुमारी खत्रीको प्रमुख आतिथ्यतामा आयोजित कार्यक्रममा स्थानीय तह तथा वडास्तरमा आगलागी नियन्त्रणका लागि आवश्यक उपकरण व्यवस्थापन र प्रभावकारी कार्ययोजना बनाइ सक्रिय रूपमा डढेलो नियन्त्रणमा लाग्नुपर्नेमा जोड दिइएको थियो।
कार्यक्रममा प्रमुख जिल्ला अधिकारी रबिन्द्र आचार्यले अघिल्लो वर्ष विभिन्न विपद् घटनाहरूमा पर्याप्त गम्भीरता नदेखाउँदा आगलागीका घटना बढेको उल्लेख गर्दै सामूहिक प्रयासबाट डढेलो नियन्त्रण सम्भव रहेको बताउनुभयो।
त्यस्तै डिभिजन वन कार्यालयका प्रमुख बसन्त केशव अधिकारीले डढेलो व्यवस्थापनका लागि निरोधात्मक उपाय अपनाउँदै जनधन तथा वन सम्पदामा हुने क्षति न्यूनीकरण गर्न सबै पक्ष सक्रिय हुनुपर्नेमा जोड दिनुभयो।
सप्ताहव्यापी कार्यक्रमअन्तर्गत जिल्लाका ६ वटै स्थानीय तहमा रहेका सामुदायिक वनमार्फत वन उपभोक्ता सचेतना, सर्वसाधारणमा सूचना प्रवाह, जोखिमयुक्त क्षेत्र सरसफाइ, विद्यालयस्तरीय शिक्षा तथा समुदायमा डढेलो नियन्त्रण समूह गठन र परिचालन गरिनेछ।
यसका साथै जोखिम बढी भएका स्थानहरूमा अग्निरेखा निर्माण गर्ने योजना पनि रहेको जनाइएको छ।
बैठकमा बेनी नगरपालिकाका मेयर सुरत केसी, प्रवक्ता रमेशकुमार श्रेष्ठ, सुरक्षा निकायका प्रमुख तथा विभिन्न सरोकारवाला निकायका प्रतिनिधिहरूको सहभागिता रहेको थियो।
