बेनी, २९ फागुन। म्याग्दीको बेनी नगरपालिका–९ तोरीपानीमा टिमुर प्रशोधन अन्तर्गत छोप बनाउने तथा प्याकेजिङसम्बन्धी तालिम सम्पन्न भएको छ। मानसिक स्वास्थ्य समस्या भएका व्यक्तिहरू र उनीहरूका संरक्षकलाई आयआर्जनमा सहयोग पु¥याउने उद्देश्यले तालिम आयोजना गरिएको हो।
अन्तर्राष्ट्रिय गैरसरकारी संस्था लिड्स नेपालको आर्थिक सहयोगमा सञ्चालन गरिएको तालिममार्फत स्थानीय रूपमा उत्पादन हुने टिमुरलाई प्रशोधन गर्ने, छोप तयार गर्ने, सुकाउने तथा प्याकेजिङ गर्ने तरिकाबारे व्यवहारिक प्रशिक्षण दिइएको छ।
लिड्स नेपाल म्याग्दीकी संयोजक निशा महतका अनुसार तालिमले मानसिक बिरामी तथा उनीहरूका संरक्षकलाई आर्थिक रूपमा आत्मनिर्भर बनाउन सहयोग पुग्ने अपेक्षा गरिएको छ। सहभागी महिलाहरूले तालिमबाट सिकेको सीप प्रयोग गरी घरमै बसेर आयआर्जन गर्न सक्ने वातावरण तयार भएको उहाँले बताउनुभयो।
तालिमका प्रशिक्षक विष्णु गर्बुजा मगरले सहभागी कृषकहरूलाई टिमुर छनोट, सफाइ, सुकाउने प्रक्रिया, प्रशोधन गर्ने तरिका तथा आकर्षक प्याकेजिङसम्बन्धी जानकारी दिनुभएको थियो। साथै प्रशोधित टिमुरलाई ब्रान्डिङ गरी बजारमा बिक्री वितरण गर्ने विषयमा पनि प्रशिक्षण प्रदान गरिएको थियो।
संरक्षक कृषि सहकारी संस्थाका संयोजक शिवकुमार खत्रीका अनुसार स्थानीय कृषकलाई मिनी टिलर वितरण, तरकारी खेतीका लागि बीउबिजन, टनेल निर्माण सामग्री उपलब्ध गराउने तथा समुदायमै कुटानी–पिसानी मिल स्थापना गर्ने जस्ता कार्यक्रम सञ्चालन गरिएका छन्।
बेनी नगरपालिका–९ र १० अन्तर्गत पर्ने तोरीपानीसहित डावा, काफलबोट, धुपिबोट, ढोलठान, नेप्टेचौर र गिठिनी क्षेत्र टिमुर खेतीका लागि उपयुक्त मानिन्छन्। यस क्षेत्रलाई टिमुर खेतीको पकेट क्षेत्रका रूपमा विकास गरिएको छ।
तस्विर : धनीलाल गर्बुजा
