म्याग्दी, फागुन-२७, राष्ट्रिय महिला भलिबल टोलीकी कप्तान अरुणा शाहीको सम्मानमा उनको गृहजिल्ला म्याग्दीमा स्तम्भ निर्माण गरिएको छ।
जिल्ला खेलकुद विकास समितिले बेनी नगरपालिका–८, कालिपुलस्थित खेलकुद विकास समितिको स्वामित्वमा रहेको जग्गामा अरुणा शाहीको स्तम्भ निर्माण गरेको हो।
खेलकुद विकास समितिका अध्यक्ष सुमन श्रेष्ठका अनुसार, देशका लागि अरुणाले पुर्याएको योगदानको कदर गर्दै उक्त स्तम्भ निर्माण गरिएको हो।
उनले अरुणा शाही खेलमार्फत पनि उज्ज्वल भविष्य बनाउन सकिन्छ भन्ने प्रेरणाको उदाहरण बनेको उल्लेख गरे।
कप्तान अरुणा शाहीले पनि स्तम्भ निर्माण गरिएकोमा खुसी व्यक्त गर्दै यस्तो सम्मानले आगामी पुस्तालाई खेल क्षेत्रमा लाग्न प्रेरणा मिल्ने विश्वास व्यक्त गरिन्।
रघुगंगा गाउँपालिका–३, पिप्लेमा जन्मिएकी शाहीले सन् २०१३ देखि नेपाली महिला भलिबल टोलीबाट देशको प्रतिनिधित्व गर्दै आएकी छन्।
सन् २०१९ देखि टोलीको कप्तानी सम्हाल्दै आएकी उनले आफ्नो नेतृत्वमा नेपाललाई वुमन्स सेन्ट्रल जोन भलिबलको उपाधि दिलाएकी छन्।
त्यस्तै दक्षिण एसियाली खेलकुदमा ऐतिहासिक रजत पदक, काभा वुमन्स भलिबल नेसन्स लिगमा रजत तथा काभा वुमन्स भलिबल च्यालेन्ज कपमा कांस्य पदक जिताउन पनि सफल भएकी छन्।
