बेनी, फागुन-१६, गण्डकी प्रदेशका मुख्यमंत्री सुरेन्द्र पाण्डेले गण्डकी प्रदेशबाट म्याग्दी जिल्लालाई बजेटमा प्राथमिकता दिइएको बताउनुभएको छ। निर्वाचन आयोगबाट अनुमति लिएर नेपाली कांग्रेस म्याग्दीले रघुगंगा गाउँपालिकामा आयोजना गरेको आमसभालाई सम्बोधन गर्दै मुख्यमन्त्री पाण्डेले सडक, शिक्षा, खानेपानीलगायत पूर्वाधार विकासमा प्रदेश सरकारको समन्वय र सहयोगमा कमी नहुने स्पष्ट पार्नुभयो।
बेगखोला, भगवती र पिप्लेमा आयोजित कार्यक्रममा उहाँले म्याग्दीका गौरवका योजनाअन्तर्गत बेनी–दरबाङ–मुना हुँदै जलजला जोड्ने सडक र बेनी–पाखापानी सडकको बाँकी कालोपत्रे कार्य अगाडि बढिरहेको जानकारी दिनुभयो। साथै, बेनी–दरबाङ सडकखण्डको पखेरामा आवश्यक बेलिब्रिजका लागि स्रोत सुनिश्चित भइसकेको र निर्वाचनपछि टेन्डर प्रक्रिया अघि बढाइने बताउनुभयो।
मुख्यमन्त्री पाण्डेले म्याग्दीको विकासमा निर्वतमान प्रतिनिधिसभा सदस्य खमबहादुर गर्बुजाको सक्रियताको प्रशंसा गर्दै प्रदेश र संघीय सरकारबीचको समन्वयले मध्यपहाडी राजमार्गको वैकल्पिक सडक विस्तारमा सहयोग पुगेको उल्लेख गर्नुभयो।
कार्यक्रममा उहाँले कांग्रेस उम्मेदवार कर्णबहादुर भण्डारीलाई विजयी बनाउन आग्रह गर्दै राजनीतिक नेतृत्वमा अनुभव र ज्ञान आवश्यक रहेको धारणा राख्नुभयो। सामाजिक सञ्जालमार्फत भ्रामक सूचना फैलाएर जनतालाई विभाजन गर्ने प्रयासप्रति सचेत रहनसमेत उहाँले आग्रह गर्नुभयो।
