बेनी, फागुन-१६, शुक्रबार बेनी नगरपालिका–६ का विभिन्न बस्तीमा पुगेर एमालेका नेता तथा प्रतिनिधि सभा सदस्यका उम्मेदवार हरिकृष्ण श्रेष्ठ ले मतदातासमक्ष भोट माग्नुभएको छ। घरदैलो तथा भेटघाट कार्यक्रममा वडाभित्रका खानेपानी, सडक तथा आधारभूत पूर्वाधारका समस्याबारे स्थानीयसँग प्रत्यक्ष संवाद गरिएको थियो।
उम्मेदवार श्रेष्ठले वडाका विकास निर्माणका अधुरा काम सम्पन्न गर्न आफूलाई विजयी गराउन आग्रह गर्नुभयो। देश निर्माणका लागि स्पष्ट भिजन र नीतिसहित अगाडि बढ्ने पार्टी नेकपा एमाले मात्रै भएको दाबी गर्दै उहाँले एमाले र आफ्ना पक्षमा मतदान गर्न अपिल गर्नुभयो।
प्रत्यक्षतर्फका उम्मेदवार श्रेष्ठले आफू तत्कालीन अर्थुङे गाविसको अध्यक्ष रहँदा सीमित स्रोतसाधनका बाबजुद सडक लगायत समुदायमा आधारित विभिन्न योजना कार्यान्वयन गरेको उल्लेख गर्नुभयो। जिम्मेवारी पाउँदा काम गरेर देखाएको अनुभव प्रस्तुत गर्दै उहाँले प्रतिनिधि सभामा पुगेपछि कानुन निर्माणसँगै जिल्लाका थप समस्या समाधानका लागि बजेट ल्याउने प्रतिबद्धता जनाउनुभयो।
केन्द्रीय सदस्यसमेत रहनुभएका श्रेष्ठले एमाले नेतृत्वको सरकारले अघि सारेको “समृद्ध म्याग्दी, सुखी म्याग्देली” अभियानलाई निरन्तरता दिँदै जिल्लामा अपुरा र अधुरा रहेका योजनाहरू पूरा गर्ने बताउनुभयो। म्याग्देली जनताले सम्झन लायक काम गरेर देखाउने उहाँको भनाइ थियो।
कार्यक्रममा वक्ताहरूले जिल्लाको विकास, स्थानीयको हकहित र रुपान्तरणका लागि कुन दलले कति काम गरेको छ भन्ने मूल्याङ्कन गरेर मतदान गर्न मतदातालाई आग्रह गरेका थिए।
चुनावी अभियानमा एमाले केन्द्रीय सदस्य एवं समानुपातिकतर्फका उम्मेदवार नरदेवी पुन, पूर्व केन्द्रीय सदस्य भुपेन्द्रबहादुर थापा, गण्डकी प्रदेश कमिटी सदस्य देवेन्द्रबहादुर केसी, जिल्ला अध्यक्ष बालकृष्ण सुवेदी लगायतको उपस्थिति रहेको थियो।
निर्वाचन नजिकिँदै जाँदा म्याग्दीमा प्रमुख दलहरूबीच प्रचारप्रसार तीव्र बन्दै गएको छ। आगामी मतदानले जिल्लाको विकासको दिशा निर्धारण गर्ने भएकाले मतदाता केन्द्रित अभियानलाई सबै दलले प्राथमिकतामा राखेका छन्।
