म्याग्दी, फागुन-१६, प्रतिनिधि सभा सदस्य निर्वाचन २०८२ को पूर्वसन्ध्यामा म्याग्दीको सदरमुकाम बेनीमा ‘निर्वाचन र आमसञ्चार’ विषयक अन्तरक्रिया कार्यक्रम सम्पन्न भएको छ। जिल्ला प्रशासन कार्यालय म्याग्दीमा आयोजित कार्यक्रममा जिल्लाको चुनावी तयारी, तथ्याङ्कीय अवस्था र आचारसंहिता पालनाको विषयमा विस्तृत छलफल गरिएको हो।
कार्यक्रममा जिल्ला निर्वाचन अधिकारी विमलप्रसाद गौतमले आसन्न निर्वाचनका लागि म्याग्दीको तयारीबारे जानकारी दिनुभयो। उहाँका अनुसार म्याग्दी निर्वाचन क्षेत्रबाट कुल ८६ हजार ३ सय ९७ जना मतदाता रहेका छन्। जसमध्ये ४४ हजार ६४ महिला, ४२ हजार ३ सय ३२ पुरुष र १ जना अन्य मतदाता रहेका छन्।
मतदानको सहजताका लागि जिल्लाभर ८४ मतदान स्थल, जसमा २ अस्थायी स्थलसमेत रहेका छन्, र १२२ मतदान केन्द्र तोकिएका छन्।
कैदीबन्दीका लागि कारागार कार्यालय र कर्मचारी तथा सुरक्षाकर्मीका लागि कर्मचारी मिलन केन्द्र परिसरमा अस्थायी मतदानको व्यवस्था मिलाइएको छ।
निर्वाचन सञ्चालनका लागि सुरक्षाकर्मी बाहेक १ हजार ७४ जना जनशक्ति परिचालन गरिनेछ। यसमा १२२ मतदान अधिकृत, १२२ सहायक मतदान अधिकृत, ३५८ सहायक कर्मचारी र ३५० स्वयंसेवक रहने निर्वाचन कार्यालयले जनाएको छ।
मतदान सम्पन्न भएपछि मतपेटिका संकलनका लागि ३० वटा जिप र १० वटा बसको व्यवस्था गरिएको छ। मतदान स्थलबाट जिपमार्फत तोकिएको केन्द्रसम्म मतपेटिका ल्याइनेछ। त्यसपछि बसमार्फत सेना, सशस्त्र प्रहरी र मतदान अधिकृतको उपस्थितिमा सदरमुकाम ल्याइनेछ। दलका प्रतिनिधि र अन्य सुरक्षाकर्मीले सो बसलाई स्कटिङ गर्ने व्यवस्था मिलाइएको मुख्य निर्वाचन अधिकृतको कार्यालयले जनाएको छ।
अन्तरक्रियाका क्रममा सहभागी पत्रकारहरूले निर्वाचन आचारसंहिता पालनाको प्रभावकारितामाथि गम्भीर प्रश्न उठाएका थिए।
गाउँगाउँमा आचारसंहिता विपरीत पर्चा, पोस्टर टाँसिएको तथा कानुनी रूपमा एक उम्मेदवारले बढीमा दुई सवारी साधन मात्र प्रयोग गर्न पाउने व्यवस्था भए पनि केही मुख्य प्रतिस्पर्धी उम्मेदवारहरूले ६–७ वटासम्म गाडी प्रयोग गरिरहेको पाइएपनि अनुगमन प्रभावकारी नभएको टिप्पणी गरिएको थियो।
कार्यक्रममा मुख्य निर्वाचन अधिकृत सूर्यबहादुर थापा, प्रमुख जिल्ला अधिकारी रविन्द्र आचार्य, प्रहरी नायव उपरीक्षक सूर्यबहादुर थापा तथा सेनानी राकेश बस्नेतले निर्वाचनलाई मर्यादित, निष्पक्ष र भयरहित वातावरणमा सम्पन्न गर्न सुरक्षा निकाय र प्रशासन प्रतिबद्ध रहेको बताएका छन्।
प्रशासनले आचारसंहिता उल्लंघनका घटनामा निगरानी बढाउने र पत्रकारहरूले उठाएका विषयलाई गम्भीरतापूर्वक लिने आश्वासन समेत दिएको छ।
निर्वाचन कार्यालयका अनुसार हाल जिल्लाका सबै ४५ वटै वडामा मतदाता शिक्षा घरदैलो कार्यक्रम सञ्चालन भइरहेको छ।
