बेनी, फागुन-९, म्याग्दीबाट प्रतिनिधिसभा सदस्य निर्वाचनका लागि स्वतन्त्र उम्मेदवारी दिनुभएका महावीर पुनले मालिका गाउँपालिकाका विभिन्न बस्तीमा पुगेर मतदातासँग भेटघाट गर्नुभएको छ।
शुक्रबार वडा नम्बर २ र ३ का विभिन्न बस्तीमा आयोजित चुनावी भेटघाट कार्यक्रममा बोल्दै उम्मेदवार पुनले आफू झुटा आश्वासन दिन नभई काम गरेर देखाउन चुनावी मैदानमा उत्रिएको बताउनुभयो। उहाँले आफ्ना योजनाहरू व्यक्तिगत स्वार्थका लागि नभई राष्ट्रको हितका लागि भएको स्पष्ट पार्नुभयो।
उहाँले भन्नुभयो, “बोलेर होइन, काम गरेर देखाउँछु। मेरो काम सबैले देख्नुभएकै छ।” पुनले आफ्नो उम्मेदवारी कुनै व्यक्ति वा दलविरुद्ध लक्षित नभएको उल्लेख गर्दै म्याग्दीवासीको समग्र हितमा काम गर्ने प्रतिबद्धता व्यक्त गर्नुभयो।
चुनावी अभियानमा संलग्न युवा विनोद बुढाथोकीका अनुसार पुनले शुक्रबार बिहानैदेखि विभिन्न बस्तीमा पुगेर मतदातासँग प्रत्यक्ष भेटघाट गर्नुभएको थियो।
आगामी फागुन २१ गते हुने प्रतिनिधिसभा सदस्य निर्वाचनका लागि पुनले शिक्षा क्षेत्रको सुधारलाई प्रमुख चुनावी मुद्दा बनाएको बताइएको छ। शिक्षा, अनुसन्धान, नवप्रवर्द्धन, रोजगारी, अर्थतन्त्र र विकासका क्षेत्रमा विशेष योजना रहेको उहाँले जानकारी दिनुभयो।
राष्ट्रिय आविष्कार केन्द्रका अध्यक्षसमेत रहनुभएका पुनले जीवनी बेचेर कारखाना सञ्चालन गरेको स्मरण गराउँदै आफूले एक रुपैयाँ पनि भ्रष्टाचार नगरेको र भ्रष्टाचारीसँग संगत नगर्ने स्पष्ट पार्नुभयो।
राजनीति नभई सेवाका लागि उम्मेदवार बनेको उहाँको भनाइ छ।
